Tramp lavozimiga kirishishdan avval Oq Uyning mehmonlar qarorgohida istiqomat qilishi ma’lum bo‘ldi

AQShning saylangan prezidenti Donald Tramp 20-yanvar kuni lavozimiga kirishishdan avval Oq Uyning mehmonlar qarorgohi — Bler-xausda istiqomat qiladi. Bu haqda uning o‘tish ma’muriyati rasmiy vakili Jeyson Miller ma’lum qildi, deb xabar bermoqda “TASS”.

U shu tariqa AQShdagi bir qator yirik OAV, jumladan, The New York Times gazetasi va CNN telekanalining Tramp Vashingtondagi o‘ziga qarashli besh yulduzli mehmonxonada bir necha kun turishi haqidagi ma’lumotlarni inkor etdi.

“Noto‘g‘ri. Saylangan prezident Bler-xausda yashaydi”, — deb yozdi Miller Twitter’dagi sahifasida. Tramp Nyu-Yorkdan Vashingtonga aynan qachon kelishiga Miller aniqlik kiritmadi.

Ma’lumot uchun, Bler-xaus — Oq Uy qarshisida joylashgan AQSh prezidenti va hukumati mehmonlarining qarorgohi bo‘lib, bu yerda, an’anaga ko‘ra, saylangan davlat rahbari inauguratsiya marosimidan bir necha kun avval joylashtiriladi.