2016-yil 16-dekabr kuni Wyndham Tashkent mehmonxonasida O‘zbekiston Savdo-sanoat palatasi O‘zbekiston Respublikasi Oliy Majlisi Senatining Xalqaro munosabatlar, tashqi iqtisodiy aloqalar va xorijiy investitsiyalar va turizm masalalari qo‘mitasi bilan hamkorlikda O‘zbekiston Respublikasi tashqi ishlar vazirligi ko‘magida xorijiy elchixonalar hamda O‘zbekistonda akkreditatsiyadan o‘tkazilgan diplomatik vakolatxonalarning vakillari ishtirokida mamlakatda ishbilarmonlik muhitini yaratishda hamda sarmoyaviy faollikni oshirishda amalga oshirilayotgan iqtisodiy islohotlar yoritilishiga bag‘ishlangan tadbir o‘tkazildi.
Tadbirda qayd etildiki, hukumat tomonidan tadbirkorlik faoliyatini yuritish, ruxsat etuvchi tartib-taomillardan o‘tish va litsenziya olish bilan bog‘liq jarayonlarni soddalashtirishga jiddiy e’tibor qaratilmoqda. Islohotlarni amalga oshirishdan ko‘zda tutilgan asosiy maqsad tadbirkorlik faoliyatining jadal rivojlanishi ta’minlash uchun kichik biznes va xususiy tadbirkorlikka ko‘proq erkinlik berishdan iborat. Respublikadagi barqaror rivojlanishning zarur shartlaridan biri ichki va tashqi investitsiyalarni jalb qilish va ulardan samarali foydalanish evaziga erishilayotgan investitsiyaviy faollik sanaladi.
Chet ellik investorning pul shaklidagi ulushi kamida 5 million AQSh dollarini tashkil qilgan xorijiy investitsiyalar ishtirokida qayta tashkil etilayotgan korxonalar soliq qonunchiligi o‘zgargan taqdirda davlat ro‘yxatidan o‘tgan vaqtidan 10 yil davomida yuridik shaxslar foydasidan olinadigan soliq, qo‘shimcha qiymat solig‘i (tovarlar, ishlar va xizmatlar savdosi bo‘yicha aylanma), mulk solig‘i, obodonlashtirish va ijtimoiy infratuzilmani rivojlantirishga solinadigan soliq, yagona ijtimoiy soliq, yagona soliq to‘lovi, shuningdek, Respublika yo‘l fondi va Ta’lim va tibbiyot muassasalarini rekonstruksiya qilish, mukammal ta’mirlash va jihozlash Fondiga to‘lanadigan majburiy to‘lovlarni davlat ro‘yxatidan o‘tgan sanasida amal qilgan me’yorlar va qoidalarga asosan qo‘llash huquqiga ega.
Respublikaning investitsiyaviy jozibadorligini oshirish uchun xorijiy investitsiyalar ishtirokidagi yangidan tashkil etiladigan ishlab chiqarish korxonalariga ularni davlat ro‘yxatidan o‘tkazish vaqtida amalda bo‘lgan soliq va boshqa majburiy to‘lovlar stavkalarini besh yil mobaynida qo‘llash huquqi beriladi. Mazkur imtiyoz investitsiya qilingan mablag‘ qiymatidan qat’i nazar xorijiy investitsiyalarga ega barcha korxonalarga ta’sir qiladi.
“Elektron hukumat” tizimini joriy etish doirasida davlat organlari faoliyatida axborot-kommunikatsiya texnologiyalarini tezkor rivojlantirish, tadbirkorlik subyektlarining vakolatli organlar bilan o‘zaro munosabatining aloqasiz shakllarini kengaytirish bo‘yicha chora-tadbirlar kompleksi belgilangan. Xususan, dasturda “yagona darcha” tamoyili bo‘yicha tadbirkorlik subyektlariga xizmatlar taqdim etishga doir yagona markazlar orqali ko‘rsatiladigan davlat xizmatlari ro‘yxatini kengaytirish bo‘yicha chora-tadbirlar nazarda tutilgan.
O‘zbekiston Prezidenti Shavkat Mirziyoyev shuningdek, 2016-yil 26-oktabrda “Erkin iqtisodiy zonalar faoliyatini faollashtirish va kengaytirishga doir qo‘shimcha chora-tadbirlar to‘g‘risida”gi Farmonga ham imzo chekdi. Ushbu hujjatda “Navoiy” erkin industrial-iqtisodiy zonasi, “Angren” va “Jizzax” maxsus industrial zonalari nomini birxillashtirish, shuningdek ularni “Navoiy”, “Angren” va “Jizzax” erkin iqtisodiy zonalar deb atash ko‘zda tutilgan.
Respublikada sayyohlik sohasida mavjud imkoniyatlardan to‘liq va samarali foydalanish hamda sohaning tashkiliy-huquqiy asoslarini mustahkamlash maqsadida, O‘zbekiston Respublikasi Prezidentining 2016-yilning 2-dekabridagi “O‘zbekiston Respublikasi sayyohlik sohasini rivojlantirishni tezlashtirish chora-tadbirlari to‘g‘risida”gi Farmoni qabul qilindi. Farmon sayyohlar uchun qulayliklar va sayyohlik tashkilotlariga afzalliklar yaratishga yo‘naltirilgan.
Davlat siyosatini samarali amalga oshirish, maqsadli vazifalar va ustuvorliklar bajarilishini tashkillashtirish va muvofiqlashtirish maqsadida, tugatilayotgan “O‘zbekturizm” Milliy kompaniyasi negizida viloyatlarda bo‘limlari va vakolatli vakillari tayinlanadigan O‘zbekiston Respublikasi Turizmni rivojlantirish davlat qo‘mitasi tashkil etildi.
Qo‘mitaning vazifalari qatoriga, birinchi navbatda, nazorat va ma’muriy funksiyalarni amalga oshirish emas, balki turizm sohasida tadbirkorlik faolligini oshirishga har tomonlama ko‘mak berish, turizm rivojlanishiga to‘sqinlik qilayotgan barcha to‘siqlarni bartaraf etish, sayyohlik xizmatlari bozorida raqobatni rivojlantirish kiradi.
Mazkur faoliyatga jalb etiladigan xorijiy investorlarga imtiyozlar taqdim etiladi. Masalan, yuridik shaxslar tomonidan kamida “to‘rt yulduzli” darajaga ega bo‘lgan mehmonxonalar va motellar foydalanishga topshirilgan taqdirda, ular 5 yil muddatga foyda solig‘i, yer va mulk solig‘i, shuningdek, yagona soliq to‘lovidan ozod etiladi. Turoperatorlar o‘zlari taqdim etgan sayyohlik xizmatlaridan kelib tushadigan chet el valyutasidagi foydaning majburiy sotilishidan ozod etiladi.
Toshkent, Samarqand, Buxoro va Urganchdagi xalqaro aeroportlarda chet ellik sayyohlar uchun yuklarni olish, transport xizmatlari ko‘rsatishning soddalashtirish tartibiga ega “yashil yo‘lak” bojxona nazorati tizimi joriy etiladi.
Farmonda shuningdek, xalqaro tashkilotlar bilan hamkorlikni rivojlantirish, sayyohlik xizmatlarini litsenziyalash va sertifikatlash, kadrlarni tayyorlash va malakasini oshirish kabi qator masalalar bo‘yicha keng ko‘lamli vazifalar belgilab berilgan. Bir so‘z bilan aytganda, hujjat turizm sohasidagi barcha faoliyat turlarini qamrab oladi. Bu kabi kompleks yondashuv O‘zbekistonda turizm sohasining yanada rivojlanishiga xizmat qiladi.
Izoh (0)