Barpo etish uchun 2,7 milliard dollar sarflangan AQSh Harbiy-dengiz kuchlarining eng yangi atom suvosti kemasi rasman USS Colorado nomini oldi, deb yozadi “TASS”.
Kemaga nom berish marosimi 3-dekabr, shanba kuni Grotondagi (Konnektikut shtati) harbiy verfda bo‘lib o‘tdi.
An’anaga ko‘ra, suvosti kemasining burun qismiga shampan shishasini urib sindirish huquqi AQSh Harbiy-dengiz kuchlari vaziri Rey Mabusning qizi Enniga taqdim etildi.
Virginia ko‘p maqsadli suvosti kemalari turiga taalluqli bo‘lgan USS Colorado’ning qurilishi 2012-yilning martida boshlagan edi. U Amerika Harbiy-dengiz kuchlari ixtiyoriga kelgusi yilning sentabrida rasman topshirilishi kerak.
Kema General Dynamics Electric Boat kemasozlik korxonasi tomonidan qurilgan. Uzunligi 115 metr atrofida bo‘lgan USS Colorado 134 nafargacha ekipaj a’zosini o‘ziga sig‘dirib, bortida Tomahawk yuqori aniqlikdagi, uzoq masofaga uchuvchi qanotli raketalarni tashishga qodir.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)