Ўзбекистон Республикаси Президенти сайловини ёритиш бўйича Республика матбуот марказида «Фуқаролар сайлов ҳуқуқлари ишончли ҳимоясини таъминлашнинг қонунчилиги ва амалиёти: Ўзбекистон ҳамда Германия тажрибаси» мавзуида халқаро давра суҳбати бўлиб ўтди. Бу ҳақда «Дарё»га матбуот маркази мутасаддилари маълум қилди.
Олий Мажлиснинг Инсон ҳуқуқлари бўйича вакили (омбудсман) ва Марказий сайлов комиссияси томонидан Конрад Аденауэр номидаги жамғарманинг мамлакатдаги ваколатхонаси билан ҳамкорликда ташкил қилинган давра суҳбатида Бош прокуратура, Олий суд, Адлия, Ички ишлар вазирликлари, жамоат ташкилотлари вакиллари, ҳуқуқшунос-олимлар, германиялик сиёсатшунослар, «Минтақавий мулоқот» халқаро нодавлат ташкилоти экспертлари қатнашди. Анжуманда, шунингдек, ЕХҲТ Демократик институтлар ва инсон ҳуқуқлари бўйича бюроси миссияси кузатувчилари ҳам иштирок этди.
Тадбир қатнашчилари фуқаролар сайлов ҳуқуқлари ишончли ҳимоясини таъминлашнинг ташкилий-ҳуқуқий механизмларини шакллантириш, фуқароларнинг сайлаш эркинлиги ҳамда жамият ва давлат ишларини бошқаришда иштирок этиш ҳуқуқини амалга оширишнинг ҳуқуқий кафолатлари борасидаги миллий ҳамда хорижий тажрибани кўриб чиқди.
— Ўзбекистонда Президент сайловига тайёргарлик кўриш ва уни юксак савияда ўтказиш йўлида кенг кўламли ишлар олиб борилмоқда, — дейди ҳуқуқшунос, Конрад Аденауэр номидаги жамғарма эксперти Х. Бюллер. – Ушбу сиёсий тадбирга қизғин ва пухта ҳозирлик ҳақида хориждаги оммавий ахборот воситалари мунтазам ахборот бериб бораяпти. Бундан ташқари, Ўзбекистоннинг Германиядаги элчихонасида немис илмий доиралари вакиллари, ҳуқуқшунослари билан учрашув ташкил этилди. Унда сайлов қонунчилигига киритилган сўнгги ўзгартиш ҳамда қўшимчалар, сайлов кампаниясининг барча босқичи, Ўзбекистон Республикаси Марказий сайлов комиссияси, сиёсий партиялар фаолияти ҳақида батафсил маълумот берилди. Давра суҳбатида Германияда сайловлар ва умумхалқ овоз беришининг қонуний асослари ҳақида маъруза қилдим. Умуман айтганда, бизнинг сайловга оид қонунларимиз ўзаро ўхшаш. Уларда сайловларнинг асосий демократик тамойиллари акс эттирилган.
— Шу кунларда Ўзбекистонда муҳим сиёсий тадбирга – Президент сайловига тайёргарлик кўрилмоқда, — дейди Конрад Аденауэр номидаги жамғарма минтақавий ваколатли вакили Т. Кунсе. — Мамлакат халқ учун ғоят муҳим бўлган бундай тадбирни ташкил қилиш бўйича ижобий тажриба тўплаган. Шунингдек, қонунчилик асосларини такомиллаштиришга ҳамда Президентликка номзодларнинг сайловчилар билан мулоқотига алоҳида эътибор қаратилаётганини таъкидлашни истардим. Жойларда учрашувлар видеоконференция шаклида ўтказилаётгани аҳолининг кенг қатламини қамраб олиш имконини бермоқда. Барча номзодга тенг шароит яратиб берилган.
— Германияда сайлов кампанияси учун асос бўлган бир қатор мажбурий тамойиллар мавжуд, — дейди Саксония федерал ери Ландтаги илмий ходими, Конрад Аденауэр номидаги жамғарма эксперти Р. Фалкнер. — Сайловлар эркин, тўғридан-тўғри ва яширин овоз бериш йўли билан умумхалқ иштирокида ўтказилиши керак. Германияда сайлов ҳуқуқини амалга оширишнинг амалий жиҳатлари ҳақидаги маърузамда давлатимизнинг ушбу масаладаги қарашларини сўзлаб бердим. Ўзбекистонда ҳам Германия интиладиган иккита умумий тамойил бор. Бу сайловларни ташкил қилиш доирасида тегишли чора-тадбирларнинг ошкоралиги ва масъуллигидир.
Германиялик экспертлар Ўзбекистон ва Германия ҳамда бошқа мамлакатлар сайлов тизимларини таққослаб, демократик сайловларнинг умумэътироф этилган тамойил ва стандартлари, Инсон ҳуқуқлари бўйича умумжаҳон декларацияси, Фуқаролик ва сиёсий ҳуқуқлар бўйича халқаро пакт, Инсонийлик мезонлари бўйича Копенгаген кенгаши ҳужжати қоидалари Ўзбекистон сайлов қонунчилигига тўлиқ имплементация қилинганини, ҳаётга самарали татбиқ этилаётганини таъкидлади.
Изоҳ (0)