Alisher Navoiy nomidagi O‘zbekiston Milliy kutubxonasida InfoLib–2016 Milliy axborot-kutubxona haftaligida faol qatnashgan ishtirokchilarni taqdirlash marosimi bo‘lib o‘tdi. Unga turli vazirlik va idoralar, axborot-kutubxona muassasalari xodimlari, o‘qituvchilar, talaba-yoshlar taklif etildi, deb xabar beradi O‘zA.
Alisher Navoiy nomidagi O‘zbekiston Milliy kutubxonasi direktori A. Xo‘jayev tadbirda chiqish qildi.
Haftalik doirasidagi “ZiyoNET ta’lim tarmog‘i doirasida masofaviy o‘quv vositalari” taqdimotida yoshlar, o‘qituvchilar o‘ndan ortiq ma’rifiy saytlar faoliyati, ularning imkoniyati, ma’lumotlari bilan tanishib chiqdi.
Xorijiy tillarni o‘rganishga oid xalqaro testlar, amaliy tavsiyalar, chet el universitetlari ta’lim dasturlarining taqdimoti ko‘pchilikda qiziqish uyg‘otdi. “Axborot-kutubxona muassasasining eng yaxshi mutaxassisi” ko‘rik-tanlovi mamlakatning turli hududlaridagi soha mutaxassislarining kasbga oid ijodiy-intellektual salohiyatini aniqlash, ular tomonidan taqdim etilgan ilg‘or innovatsion ish usullarini keng jamoatchilikka yaqindan tanishtirish imkonini berdi.
Haftalik yakunida turli ma’rifiy loyihalar, viktorinalar, ijodiy tanlovlar, rasmlar, fotoko‘rgazmalarda faol qatnashgan ishtirokchilarga diplom va esdalik sovg‘alari topshirildi.
Izoh (0)