Алишер Навоий номидаги Ўзбекистон Миллий кутубхонасида InfoLib–2016 Миллий ахборот-кутубхона ҳафталигида фаол қатнашган иштирокчиларни тақдирлаш маросими бўлиб ўтди. Унга турли вазирлик ва идоралар, ахборот-кутубхона муассасалари ходимлари, ўқитувчилар, талаба-ёшлар таклиф этилди, деб хабар беради ЎзА.
Алишер Навоий номидаги Ўзбекистон Миллий кутубхонаси директори А. Хўжаев тадбирда чиқиш қилди.
Ҳафталик доирасидаги «ZiyoNET таълим тармоғи доирасида масофавий ўқув воситалари» тақдимотида ёшлар, ўқитувчилар ўндан ортиқ маърифий сайтлар фаолияти, уларнинг имконияти, маълумотлари билан танишиб чиқди.
Хорижий тилларни ўрганишга оид халқаро тестлар, амалий тавсиялар, чет эл университетлари таълим дастурларининг тақдимоти кўпчиликда қизиқиш уйғотди. «Ахборот-кутубхона муассасасининг энг яхши мутахассиси» кўрик-танлови мамлакатнинг турли ҳудудларидаги соҳа мутахассисларининг касбга оид ижодий-интеллектуал салоҳиятини аниқлаш, улар томонидан тақдим этилган илғор инновацион иш усулларини кенг жамоатчиликка яқиндан таништириш имконини берди.
Ҳафталик якунида турли маърифий лойиҳалар, викториналар, ижодий танловлар, расмлар, фотокўргазмаларда фаол қатнашган иштирокчиларга диплом ва эсдалик совғалари топширилди.
Изоҳ (0)