Venada O‘zbekistonning Avstriyadagi elchixonasi tomonidan Avstriya—O‘zbekiston do‘stlik jamiyati bilan hamkorlikda brifing tashkil etildi. Bu haqda “Jahon” axborot agentligi xabar bermoqda.
Avstriyaning siyosiy, akademik va ishbilarmon doira vakillari O‘zbekiston Respublikasi Prezidenti sayloviga tayyorgarlik ko‘rish hamda uni o‘tkazish jarayonlari, shuningdek, Islom hamkorlik tashkiloti tashqi ishlar vazirlari kengashining 43-sessiyasi yakunlari, O‘zbekiston Respublikasi Prezidenti vazifasini bajaruvchi Shavkat Mirziyoyevning sessiya ochilish marosimidagi ma’ruzasi bilan tanishdi.
— O‘zbekistondagi Prezident va parlament saylovlarida xalqaro kuzatuvchi sifatida ishtirok etganman. Mamlakatda ovoz berish tizimi nechog‘li uyushqoqlik bilan ishlashi, saylov jarayonining o‘tishidan hayratda qolgandim. Xalq ovoz berishda faol qatnashgan va demokratik huquqlaridan samarali foydalangandi, — deya ta’kidladi Avstriya—O‘zbekiston do‘stlik jamiyati prezidenti, Askin&Co kompaniyasi boshqaruvchisi Xerbert Lugbauer.
— Konfessiyalararo ziddiyatlar kuchaygan bir sharoitda O‘zbekiston o‘zining hamjihatlikda yashayotgan ko‘pmillionli va ko‘pmillati aholisi bilan o‘ziga xos o‘rnak bo‘lmoqda, — deydi Vena universiteti professori, VENI – Vienna Eurasia Network Initiative nodavlat tashkiloti ekspertlari tarmog‘i raisi Peter Felx. — O‘zbekistondagi bo‘lajak saylovlar haqida gapiradigan bo‘lsak, Prezidentlikka nomzodlar uchun saylovoldi kampaniyasi hamda tashviqot tadbirlarini o‘tkazish uchun bir xil sharoit va imkoniyatlar yaratilgan.
O‘zbekiston hukumati va xalqiga prezidentlik saylovlarini muvaffaqiyatli o‘tkazishlarini tilab qolaman. Ovoz berish milliy qonunchilik va xalqaro standartlarga to‘liq rioya etgan holda bo‘lib o‘tishiga ishonchim komil.
Izoh (0)