Nonushta uchun mevali puding va yong‘oqli pechenye

Nonushtaga yaqinlaringizni foydali va mazali taomlar bilan xursand qilish istagida bo‘lsangiz, maqolada keltirilgan retseptlar sizga ko‘mak berishiga ishonamiz.

Yong‘oqli pechenye

Un qo‘shilmaydigan ushbu foydali desert yong‘oqlar tarkibidagi yog‘ kislotalari va oqsil tufayli tetiklik va quvvat bag‘ishlaydi.

Kerakli masalliqlar

• 2 stakan yong‘oq (bodom yoki funduk qo‘shishingiz ham mumkin);
• 350 gramm shakar;
• 1/2 choy qoshiq tuz;
• 4 ta tuxumning oqi;
• ta’bga qarab vanilin.

Tayyorlanishi

Yong‘oq va shakarni blenderda mayda ushoq holiga kelguncha maydalang. Tuxum oqini tuz bilan ko‘pirtiring, keyin asta-sekinlik bilan yong‘oqli aralashma va vanilinni qo‘shing. Ko‘pirtirishda davom eting.

Pishiriq uchun qog‘oz to‘shalgan duxovka listiga aralashmani qoshiq bilan joylashtirib chiqing. 160 darajagacha qizdirilgan duxovkada tillarangga kirguncha (taxminan 30 daqiqa) pishiring.

Mevali puding

Kerakli masalliqlar

• 100 gramm suli yormasi;
• 200 ml tabiiy yogurt;
• ta’bga qarab mevalar;
• ta’bga qarab vanilin, dolchin yoki kardamon.

Tayyorlanishi

Yorma, sevimli ziravorlaringiz va yogurtni aralashtiring. Kechasi bilan sovutkichda qoldiring. Tongda esa unga mevalar, kokos qirindisi, yong‘oq yoki quruq mevalardan qo‘shing.

Yoqimli ishtaha!

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.