O‘zbekistonlik futbolchilar Sardor Rashidov va Aziz Haydarov harakat qiladigan klublar o‘z mamlakati ichki chempionatida 4-turni o‘tkazdi.
Aziz Haydarovning “Ash-Shabob” klubi BAA chempionatining dastlabki uch turida 9 ochkoni qo‘lga kiritgandi. 21-oktabr kuni 4-turni “Emireytes”ga qarshi o‘tkazgan “Shabob” 1:0 hisobida zafar quchdi. 4-turdan keyin yuz foizlik natija qayd etib turgan jamoa Amirlik ligasida peshqadam bo‘lib turibdi.
Aziz Haydarov mavsum boshidan buyon o‘tkazilgan har to‘rtala o‘yinda ham 90 daqiqadan harakat qildi. Qayd etish kerak, Haydarov tashrifidan so‘ng “Ash-Shabob”ga Amirlik chempionligini nishonlash nasib qilmagan.
Sardor Rashidovning “Al-Jaish” klubi ham Qatar Yulduzlar Ligasining dastlabki uch turidan so‘ng yuz foizlik natija qayd etib turgandi. 4-turni “Ar-Rayyan” maydonida o‘tkazgan klub 2 ochko yo‘qotdi — 1:1.
Rashidov 55-daqiqaga qadar maydonda to‘p surdi va keyinchalik o‘rnini jamoadoshiga bo‘shatib berdi. Uning klubidan Seydu Keyta gol urgan bo‘lsa, mezbonlardan Serxio Garsiya muvaffaqiyat qozondi.
4-turdan keyin “As-Sadd” 10 ochko bilan Qatar chempionatida peshqadam. Shuncha ochkosi bor “Al-Jaish” esa to‘plar nisbatiga ko‘ra ikkinchi bo‘lib turibdi.
Izoh (0)