Pentagon Suriyada AQSh samolyoti urib tushirilgani haqidagi xabarlarni tasdiqlamadi

Suriya hududida IShID jangarilari tomonidan AQSh harbiy samolyotining urib tushirilgani haqidagi xabarlar haqiqatga mos kelmaydi. Bu haqda Pentagon matbuot kotibi Piter Kuk bayonot berdi, deb xabar qilmoqda “Vedomosti”.

“Koalitsiyaning barcha samolyotlari joyida”, — deb yozdi Kuk Twitter’dagi sahifasida.

Ilgariroq kurd matbuoti, xususan, Rudaw agentligi al-Xasaka shahri osmonida AQShning A-10 samolyoti urib tushirilganini yozgan edi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.