Tadqiqotchi Timur Nurulin Toshkentning Eski shahar qismidagi Zarqaynar ko‘chasini rekonstruksiya qilish bo‘yicha taklif-loyihani taqdim etdi. “Shosh.uz”ning yozishicha, loyiha Toshkentning Eski shahar qismini rekonstruksiya qilish bo‘yicha 2020 yilga qadar mo‘ljallangan dastur doirasida ishlab chiqilgan.
Mazkur loyiha Toshkentning Eski shahar qismidagi ko‘chalarda, bir tomondan — mahalliy iqlim sharoitlarini hisobga olib, tabiiy qurilish materiallari, an’anaviy me’moriy yechim va naqshlarni qo‘llagan holda joyning tarixiy qiyofasini qayta tiklash, boshqa tomondan — barcha kommunikatsiyalarni o‘tkazgan holda aholi turmush sharoitlarini yaxshilashni nazarda tutadi.
Loyiha turar-joy fondining tubdan rekonstruksiya qilinishini ko‘zda tutmaydi, aksincha, mavjud ko‘rinishga yangi sayqal berib, fasad estetikasini yaxshilash, alohida hollarda esa qo‘shimcha inshootlar qurishni taklif qiladi (masalan, ko‘cha tomonda suvenirlar, hunarmandchilik buyumlarini sotishga mo‘ljallangan rastalar qo‘shilgan).
“Bularning bari Eski shahar ko‘chalari bo‘ylab sayr qilayotgan shaharliklar va Toshkent mehmonlariga bu binolar qurilgan XIX asr oxiri — XX asr boshidagi muhitni his qilishga imkon beradi”, — deb yozadi “Shosh.uz”.
Mazkur rekonstruksiya loyihasi qachondir amalga oshiriladimi-yo‘qmi, bunga aniqlik kiritilmagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)