Surxondaryoda 150 ga yaqin mahalla, qishloq va ko‘chaga yangi nom berildi
Surxondaryoda shahar va tuman komissiyalari, boshqa aloqador tashkilotlar, keng jamoatchilikning taklif va tavsiyalariga asosan shu kungacha 2 mingdan ortiq geografik obyektlar nomi o‘zgartirildi. Bu haqda O‘zA xabar bermoqda.
Joriy yilning o‘tgan davrida Geografik obyektlarning nomlari sohasidagi ishlarni tartibga solish masalalari bo‘yicha viloyat komissiyasi joylardan tushgan takliflarni o‘rganib, 150 ga yaqin mahalla, qishloq, ko‘cha va boshqa geografik obyektlarga yangi nom berish haqida qaror qabul qildi.
Tahlillar shuni ko‘rsatmoqdaki, viloyatdagi ayrim hududlarda muayyan shaxslar nomi bilan yuritiladigan mahalla, qishloq va ko‘chalar hali ham mavjud. Joylardagi komissiyalar bunday hududlarni o‘rganib, ularni qayta nomlash taklifini ilgari surmoqda. Masalan, Denov tumanidagi mahallalardan biri hozirgacha Qo‘zi Karimov nomi bilan yuritib kelingan. Yuqorida zikr etilgan viloyat komissiyasi mahallani Bahoriston nomi bilan atashga qaror qildi. Yoki shu tumanning Haydar Murodov nomidagi mahalla fuqarolar yig‘ini O‘rikzor, Abdulla Nabiyev nomidagi mahalla fuqarolar yig‘ini Yangi hayot nomlari bilan almashtirildi.
– Geografik obyektlarning nomlari sohasidagi ishlarni tartibga solish masalalari bo‘yicha viloyat komissiyasining shu yil o‘tkazgan yig‘ilishlarida Denov tumanidagi 140 mahalla, ko‘cha va boshqa obyektlar qayta nomlandi, – deydi viloyat hokimligining mas’ul xodimi Davron Boboyorov. – Qiziriq, Sho‘rchi va Uzun tumanlarining har birida to‘rttadan obyekt nomi “Davlat tili haqida”gi qonun talablariga moslashtirildi.
