Toshkent viloyatining Bo‘stonliq tumanida joylashgan “Xon baliq” forel xo‘jaligi dam olish maskanida “Men sevgan o‘zbek taomi” I Xalqaro pazandachilik festivali bo‘lib o‘tdi. Bu haqda “Jahon” axborot agentligi xabar bermoqda.
O‘zbekiston Oshpazlar uyushmasi, Tashqi ishlar vazirligining Diplomatik vakolatxonalarga xizmat ko‘rsatish boshqarmasi hamda O‘zbekiston Oliy va o‘rta maxsus ta’lim vazirligi o‘zaro hamkorligida tashkil etilgan tadbirda diplomatlar, xalqaro tashkilotlar, vazirlik va idora, qo‘shma korxonalar vakillari ishtirok etdi. Anjuman o‘zbek milliy pazandachilik san’atini dunyo xalqlari orasida targ‘ib etish maqsadida uyushtirildi.
Tadbir doirasida viloyatlar va Toshkent shahri, shuningdek, Rossiya, Indoneziya, Ozarbayjon, Bangladesh, Xitoy, Ukraina, Qirg‘iziston va boshqa qator xorijiy mamlakatlarning O‘zbekistondagi elchixonalari vakillari tomonidan tayyorlagan taomlar namoyish etildi. O‘zbekistonning “Gastronomik turizm” xaritasini tuzish maqsadida “Hududiy antiqa taom” mavzusidagi ko‘rik-tanlov ham o‘tkazildi.
— O‘zbekiston jahon sayyohlik markazlaridan biri bo‘lgani bois ko‘plab sayyohlar keladi. Shunday bo‘lsa-da, milliy taomlarni chet ellarda targ‘ib etishga alohida e’tibor qaratmoqdamiz. Uyushma mutaxassislari tomonidan tayyorlangan “O‘zbek an’anaviy taomlari” kitobi o‘zbek, rus, ingliz va nemis tillarida chop etildi. “O‘zbek urf-odatlari, an’analari va milliy taomlari” nemis tilida nashrdan chiqdi. Yaqinda “Indoneziya an’anaviy taomlari” kitobi o‘zbek tilida o‘quvchilar e’tiboriga taqdim etildi. O‘zbek milliy taomlarini xorijiy mamlakatlardagi qo‘llanmalarga kiritish borasidagi ishlarni davom ettirmoqdamiz, — deya ta’kidladi O‘zbekiston Oshpazlar uyushmasi raisi Akbar Umarov.
Izoh (0)