Tailand qiroli Pumipon Adulyadetning o‘limi haqidagi xabardan keyin mamlakatda 30 kunlik motam e’lon qilindi. Bundan tashqari, amaldorlar uchun bir yillik motam amal qiladi, deb yozadi “RBK”.
Eslatib o‘tamiz, qirol Pumipon Adulyadet 88 yoshida olamdan o‘tdi. U 1972-yili o‘zining valiahdi etib shahzoda Maxa Vachiralongkornni tayinlagan edi. Mamlakat qonunchiligiga muvofiq, qirolning o‘limidan so‘ng parlamentning favqulodda yig‘ilishi o‘tkazilib, uning yakunlariga ko‘ra valiahd taxtga chorlanishi lozim edi. Ammo parlament majlisidan so‘ng Maxa Vachiralongkorn taxtga chorlanmadi. Bosh vazirning aytishicha, shahzodaning o‘zi ushbu rasmiyatchilikni o‘tkazishga shoshilmay, “millat bilan birgalikda qayg‘uga cho‘mish” imkonini berishni so‘ragan.
Endilikda voris nomi parlamentning maxsus yig‘ilishida oshkor etiladigan bo‘ldi. Bu voris Maxa Vachiralongkorn bo‘lishi kutilmoqda.
Buddizm an’analariga ko‘ra, qirol jasadi uch kun davomida ibodatxonada saqlanadi, u yerda odamlar u bilan vidolashishi mumkin. So‘ng jasad kuydiriladi.
Tailand ahli qirolning o‘limi haqidagi yangilikka qanday reaksiya ko‘rsatgani “RBK” fotogalereyasida o‘z aksini topdi.
Izoh (0)