14-oktabr, juma kuni AQSh prezidenti Barak Obama xalqaro masalalar bo‘yicha yuqori mansabli maslahatchilar bilan uchrashuv o‘tkazadi, unda AQShning Suriyadagi keyingi harakatlari bo‘yicha jangovar va boshqa variantlar ko‘rib chiqiladi. Bu haqda Amerika hukumatidagi anonim vakillariga tayanib, Reuters xabar berdi, deb yozadi “RBK”.
Amerikalik amaldorlarning bir qismi AQSh Suriyada qat’iyroq choralarni qo‘llashi kerak, deb hisoblaydi, chunki aks holda, u ayni paytda IShIDga qarshi kurash olib borayotgan mo‘tadil isyonchilar hamda arab, kurd va turk ittifoqdoshlariga nisbatan ega bo‘lgan ta’sirini yo‘qotishi mumkin.
Majlisda ko‘rib chiqilishi mumkin bo‘lgan variantlardan biri AQShning bevosita jangovar harakatlarini, xususan, Suriyadagi harbiy bazalarga, o‘q-dori omborlariga va raketaga qarshi mudofaa vositalariga aviazarbalarni ko‘zda tutadi.
Reuters manbalari fikricha, Obama Suriya hukumati nishonlariga havodan zarba berishni ma’qullashi amri mahol. Ularning ta’kidlashicha, hozircha hech qanday qaror qabul qilingani yo‘q va isyonchilarni zamonaviyroq qurol-yarog‘ bilan ta’minlashni nazarda tutuvchi muqobil variant mavjud. Shu bilan birga, amaldorlar bunda gap havo hujumiga qarshi raketalar haqida bormayotgani, chunki Vashington ushbu qurol dushman qo‘liga tushib qolishidan xavfsirashini qayd etdi.
Izoh (0)