O‘zbekistonda o‘ta muhim obyektlar qo‘riqlanishi bo‘yicha majburiyatlarning bajarilmasligi uchun javobgarlik joriy etildi

O‘zbekiston Jinoyat kodeksi va Ma’muriy javobgarlik to‘g‘risidagi kodeksiga kiritilgan qo‘shimchalarga muvofiq, o‘ta muhim va toifalangan obyektlar qo‘riqlanishi bo‘yicha majburiyatlarning bajarilmasligi uchun javobgarlik joriy etildi. Bu haqda Norma xabar berdi. 

Ma’muriy javobgarlik to‘g‘risidagi kodeksning 210¹-moddasiga muvofiq, o‘ta muhim va toifalangan obyektlarga kirish-chiqish rejimini buzish, ya’ni tegishli ruxsatnomasiz o‘ta muhim va toifalangan obyektlarga shaxsning o‘zboshimchalik bilan kirishi, ushbu obyektlarda transport vositalarining harakatlanishi yoki mol-mulkning joyini o‘zgartirish fuqarolarga eng kam ish haqining 1 baravaridan 3 baravarigacha, mansabdor shaxslarga esa 3 baravaridan 5 baravarigacha miqdorda jarima solishga sabab bo‘ladi.

O‘ta muhim va toifalangan obyektlarning qo‘riqlanishini ta’minlashga doir majburiyatlarni korxonalar, muassasalar va tashkilotlarning ularni bajarishga mas’ul bo‘lgan mansabdor shaxslari tomonidan bajarilmasligi eng kam ish haqining 15 baravaridan 30 baravarigacha miqdorda jarima solishga yoki 15 sutkagacha ma’muriy qamoqqa olishga sabab bo‘ladi.

Jinoyat kodeksining 259¹-moddasiga ko‘ra, o‘ta muhim va toifalangan ob’ektlarning qo‘riqlanishini ta’minlashga doir majburiyatlarni korxonalar, muassasalar va tashkilotlarning ularni bajarishga mas’ul bo‘lgan mansabdor shaxslari tomonidan bajarilmasligi, shunday harakat uchun ma’muriy jazo qo‘llanilganidan keyin sodir etilgan bo‘lsa eng kam oylik ish haqining 50 baravaridan 100 baravarigacha miqdorda jarima yoki 3 yilgacha muayyan huquqdan mahrum qilish yoxud 3 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.