21—23-sentabrda ICTWeek 2016 Axborot-kommunikatsiya texnologiyalari haftaligi doirasida Toshkent va Namangan shaharlarida an’anaviy ICTExpo 2016 axborot texnologiyalari milliy ko‘rgazmasi bo‘lib o‘tdi.
Mazkur ko‘rgazmada Ucell kompaniyasi “Innovatsiyalar – barcha uchun!” shiori ostida so‘nggi mahsulot va xizmatlari bilan qatnashdi.
Avvalgi ko‘rgazmalarda Ucell kompaniyasi to‘rt marta “Eng ko‘p tashrif buyurilgan stend” mukofotiga sazovor bo‘lgandi. Joriy yilda kompaniya jamoasi mazkur namoyishga mobil texnologiyalar sohasidagi eng zamonaviy trendlarni hisobga olgan holda yanada o‘ziga xos tarzda yondashdi. Ko‘rgazmaga kelganlar yangiliklar bilan tanishish, ularni amalda sinab ko‘rish hamda eng yuqori tezlikdagi mobil internetdan sinov tariqasida foydalanish imkoniga ega bo‘ldi.
Har bir mehmonga Ucell kompaniyasi vakilidan kompaniyaning ko‘rgazmadagi tadbirlari dasturi va maxsus beyj taqdim etildi. Beyjdagi shaxsiy raqam Ucell o‘yinlarida qatnashish va qimmatli sovg‘alarni yutib olish imkonini berdi. Dasturda tanlov va viktorinalar nomlari va vaqti ko‘rsatilgan. Tanlovlarning aksariyati kompaniyaning tarif va xizmatlariga bag‘ishlandi, masalan, “1 ta SIM-karta – 2 ta mamlakat”, “Raqamni bron qilish”, “Mobil anons” viktorinalari, “Baxtli 25” tarifi shular jumlasidan.
Kompaniyaning eng qiziqarli stendlaridan biri — to‘rtinchi avlod texnologiyasiga, uning Toshkent shahri va hududlardagi qamrovi, mobil internet bilan bog‘liq mahsulotlar va xizmatlarga bag‘ishlangan. 4G-smartfonlaridan foydalangan holda yuqori tezlikni tekshirib, sinab ko‘rish imkonini beruvchi sinov hududi ham mehmonlarni mamnun qildi.
Ko‘rgazmada har bir kishi o‘zini yangi qiyofada ko‘rish imkoniga ega bo‘ldi. Xoreograf Sergey Zlotnik va UZduo jamoasining akrobatlari tashkil etgan mahorat darslari hamda boshqa ko‘plab tanlovlarda faol ishtirok etganlar Ucell kompaniyasining esdalik sovg‘alari bilan taqdirlandi.
Joriy yilda kompaniya Namangan shahridagi “Pahlavon” sport majmuasida ham o‘z stendini namoyish etdi. Bu yerga tashrif buyurganlarga eng ommaviy xizmatlar va mahsulotlar haqida ma’lumot berildi, tanlov va viktorinalar tashkil etilib, qimmatbaho sovg‘alar topshirildi. Iste’mol segmenti departamenti direktori Agshin Gadjiyevning so‘zlariga ko‘ra, Ucell kompaniyasi innovatsiya xizmatlari bo‘yicha yangi ishlanmalar ustida ish olib bormoqda. Kompaniya mobil xizmatlar bozoriga sarmoya kiritib, uni yanada kengaytirishga hissa qo‘shmoqda va shu orqali mijozlarning kundalik hayoti va faoliyatini yanada sodda, qulay, tejamkor, bir so‘z bilan aytganda, yanada yaxshiroq qilishga harakat qilmoqda.
— Mazkur ko‘rgazmada ishtirok etish biz uchun fikr va ma’lumot almashish uchun ajoyib imkoniyat bo‘ldi, — deydi A.Gadjiyev. — Biz o‘z mijozlarimiz bilan uchrashishdan hamisha baxtiyormiz. Bundan tashqari, mazkur ko‘rgazma kompaniyamiz taraqqiyoti va mamlakatimiz iqtisodiyotini yanada rivojlantirishda yangi hamkorlik aloqalarini o‘rnatish uchun muhim asos bo‘lib xizmat qiladi.
Mazkur ko‘rgazma O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Oliy Majlis Qonunchilik palatasining Axborot va kommunikatsiya texnologiyalari masalalari qo‘mitasi, Vazirlar Mahkamasining Axborot tizimlari va telekommunikatsiyalar masalalari axborot-tahliliy departamenti rasmiy ko‘magida tashkil etilib, mamlakatda ushbu sohada o‘tkaziladigan e’tiborga molik tadbirlardan biri hisoblanadi.
ICTWeek haftaligi – zamonaviy texnologiyalar yutuqlari namoyish etiladigan tadbir. Ucell kompaniyasi o‘z mijozlari bilan yuzma-yuz uchrashib, ularning fikrini o‘rganib, taqdim etilayotgan xizmatlar sifatini oshirmoqda.
Reklama huquqi asosida. Xizmatlar litsenziyalangan.
Izoh (0)