БМТ Бош Ассамблеяси 2 сентябрь куни 78 ёшида вафот этган Ўзбекистон Биринчи Президенти Ислом Каримов хотирасига ҳурмат бажо келтирди, дея хабар бермоқда «ТАСС». Мажлис бир дақиқалик сукут билан бошланди, шундан сўнг 71-сессия раиси Питер Томсон, шунингдек, ташкилот бош котиби Пан Ги Мун ва бошқа қатор мамлакатлар вакиллари чиқиш қилди.
БМТ бош котиби таъкидлашича, Ислом Каримовнинг энг муҳим ютуқларидан бири 2009 йилда Марказий Осиёда ядро қуролидан холи бўлган ҳудудни яратишга қўшган ҳиссаси бўлди. Пан Ги Мун Ўзбекистонга икки марта расмий ташриф билан боргани ва «мамлакат халқининг самимийлигини ҳис этганини» эслатди.
«Бугун, Ўзбекистон мустақилликка эришганидан 25 йил ўтгач, бир пайтлар Президент Каримов айтганидек, халқ манфаати, ҳуқуқ ва эркинликлари мамлакатни ривожлантириш бўйича куч-ҳаракатлар юқорисида туриши керак», — деди у.
Унинг сўзларига кўра, БМТ Ўзбекистонга «чуқур ислоҳотлар ўтказишда, демократия институтларини барпо этишда ҳамда инклюзивлик ва музокаралар муҳитини қўллаб-қувватлашда» ёрдам бериш учун қатъийликка тўла.
Дипломатлар ўз нутқларида Ислом Каримовнинг ядродан холи ҳудудни яратишдаги, шунингдек минтақада барқарорликни таъминлашдаги ҳиссасини қайд этди. Қозоғистоннинг БМТдаги доимий вакили Кайрат Абдураҳмонов таъкидлаганидек, Ўзбекистон Президенти принципли ва ҳалол етакчи эди, шунингдек, халқаро ҳамжамият билан ҳамкорлик йўналиши тарафдори эди.
Ўз навбатида, Шарқий Европа давлатлари гуруҳи номидан сўзга чиққан Эстония вакили Ўзбекистон Каримов раҳбарлиги остида Марказий Осиёда барқарорликка ва халқаро алоқалар ривожланишига имконият яратган сиёсатни олиб борганини айтди.
Ўзбекистоннинг доимий вакили Музаффар Мадраҳимов мажлис иштирокчиларига ўз ҳамюртлари учун бундай оғир дақиқаларда ҳамдардлик ва кўмак сўзлари учун миннатдорлик билдирди. У Ўзбекистон халқи оғир ва ўрнини қоплаб бўлмайдиган талафотни бошдан кечирганини айтди.
Изоҳ (0)