Endilikda katta qismi Xitoyning China Baoli kompaniyasiga tegishli bo‘lgan Yota Devices’ning yangi rahbariyati rossiyalik xodimlarni ommaviy tarzda ishdan bo‘shata boshladi, deb yozadi “Hi-tech.mail.ru”. Bu haqda Life nashri Yota’dagi ichki manbasiga tayanib ma’lum qilgan.
Yota Devices’ning yangi aksiyadori China Baoli Rossiyadagi mutaxassislar va top-menejerlarni ishdan ketkizishni boshladi. Sentabr oyida mahsulotlar bo‘yicha vitse-prezident o‘z lavozimini tark etdi, u bilan birga yana 14 muhandisni ishdan haydashdi.
Endi China Baoli YotaPhone 3 smartfonini ishlab chiqish va ishlab chiqarish bilan mustaqil shug‘ullanadi. Buning uchun Xitoyda tadqiqot va ishlab chiqish markazi ochildi.
Shunga qaramay, Yota Devices aksiyalarining bir qismi hamon “Rostex” DK va Telconet’ga (China Baoli undan qimmatli qog‘ozlarning 30 foizini xarid qilgan) tegishli bo‘lib qolmoqda. Biroq Life manbasi ta’kidlashicha, mahalliy kompaniyalar biznesni va intellektual mulkni saqlab qolishni rejalashtirmayapti.
Izoh (0)