Qirg‘iziston Ichki ishlar vazirligi (IIV) mamlakat poytaxtida Mustaqil Davlatlar Hamdo‘stligi (MDH)ga a’zo davlatlar rahbarlarining yubiley yig‘ilishi bo‘lib o‘tishi munosabati bilan qo‘shimcha xavfsizlik choralarini ko‘rmoqda, deya xabar bermoqda “TASS”.
“Barcha strategik va hayotni ta’minlash obyektlari kuchaytirilgan himoya ostiga olingan. Portlovchi moddalar, qurol va o‘q-dori saqlanadigan muassasalar qo‘riqlanishiga alohida ahamiyat berilmoqda. Poytaxtga kirib kelayotgan yoki chiqib ketayotgan avtotransport izchil tekshirilmoqda. Shuningdek, oldinroq ekstremistik tashkilotlar bilan aloqalari aniqlangan shaxslar bilan profilaktika tadbirlari o‘tkazildi. Bunday yuksak darajadagi tadbirlar munosabati bilan ko‘zda tutilgan tartib va xavfsizlikni ta’minlash bo‘yicha kompleks choralar amalga oshirilmoqda”, — deyiladi Qirg‘iziston IIV matbuot xizmati axborotida.
Bo‘lajak sammit qatnashchilari va mehmonlarini qo‘riqlashga Qirg‘iziston militsiyasining jami 3 mingga yaqin xodimi jalb etiladi. Ular yordamida delegatsiyalar harakati yo‘nalishlari va odamlar ommaviy to‘planish joylari sinchiklab tekshirildi hamda kunu tun qo‘riqlash ostiga olindi.
Ma’lumot uchun, MDHga a’zo davlatlar rahbarlarining 25-yig‘ilishi Bishkekda 16-sentabr, juma kuni bo‘lib o‘tadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)