Kongress vakillar palatasi AQShda xalqaro terrorchi tashkilotlar uyushtirgan hujumlar qurbonlari oilasiga ularni qo‘llayotgan davlatlarga nisbatan mamlakat hududida da’vo qo‘zg‘ash huquqini beruvchi hujjatni imzoladi. Bu haqda “RBK” xabar bermoqda.
Mazkur hujjat rasmiylarga boshqa davlatlarning AQShdagi bank hisob raqamlari va boshqa aktivlarini muzlatish imkonini beradi. May o‘rtalarida hujjat senat tomonidan ma’qullangandi.
Ushbu tashabbus tufayli, jumladan, 2001-yilning 11-sentabr teraktlarida yaqinlarini yo‘qotgan amerikaliklar Saudiya Arabistoniga qarshi da’vo qo‘zg‘ashi mumkin. Teraktning 19 nafar ishtirokchisidan 15 nafari saudiyalik bo‘lgan va ular, tasdiqlanmagan ma’lumotlarga ko‘ra, mamlakat rasmiylari bilan bog‘liq mansabdorlardan yordam olgan.
Barak Obamaning Yaqin Sharq siyosati bo‘yicha sobiq maslahatchisi Dennis Rossning ta’kidlashicha, prezident ma’muriyati Kongress tomonidan qabul qilingan hujjatga taqiq qo‘yishga bor kuchi bilan harakat qiladi. Biroq qonun chiqaruvchilar deyarli yakdillik bilan hujjat uchun ovoz bergani Kongressga mazkur taqiqni yengib o‘tish imkoniyatini tug‘dirishi mumkin.
Izoh (0)