Avstriya rasmiylari prezidentlik saylovlari ikkinchi bosqichini o‘tkazish sanasini byulletenlar bilan bog‘liq muammolar tufayli ko‘chirilishi ehtimolini istisno etmayapti. Bu haqda “RIA Novosti” xabar bermoqda.
Gap shundaki, saylovchi tomonidan to‘ldirilgan hujjat yelimlanib yopilishi va ovozlar sanalayotgan paytdagina ochilishi lozim, chiqarilgan varaqlar esa yelimlanadigan qirg‘og‘idagi nuqson tufayli haqiqiy emas deb topilishi mumkin. Saylov tashkillanishi uchun mas’ul bo‘lgan mamlakat ichki ishlar vazirligi rahbari Volfgang Sobotka mazkur nuqson saylov ko‘ngildagidek o‘tishi uchun xalaqit beradigan bo‘lsa, uning o‘tkazilish sanasi muammo hal etilmaguncha ko‘chirilishi mumkinligini ma’lum qildi.
Ma’lumot uchun, Avstriyada bahorda ikki bosqichda bo‘lib o‘tgan davlat rahbari saylovida “yashillar”ning sobiq yetakchisi Aleksandr Van der Bellen 0,6% farq bilan o‘ng millatchilar ozodlik partiyasi nomzodi Norbert Xofer ustidan g‘olib chiqqandi. Biroq keyinchalik mamlakat Konstitutsiyaviy sudi byulletenlarni hisoblashdagi kamchiliklar tufayli ovoz berish natijalarini bekor qildi va mazkur nomzodlar ishtirokida 2-oktabr kuni qayta saylov o‘tkazilishini belgiladi.
Izoh (0)