Fransiya Alp tog‘laridagi buzilgan dor yo‘lidagi bo‘lmada 14 soat davomida qolib ketgan 33 kishi qutqaruvchilar tomonidan qutqarildi. Bu haqda, Le Monde’ga asoslanib, “RBK” xabar bermoqda.
Hozirgi vaqtga kelib mexaniklar dor yo‘lini ishga tushirishga muvaffaq bo‘lgan. Dor yo‘lida xizmat ko‘rsatuvchi Panoramic Mont-Blanc kompaniyasi bosh direktori Matyo Deshavanning aniqlik kiritishicha, qutqaruvchilar tizimni to‘xtatib qo‘ygan so‘nggi trosdagi tugunni yechib yuborgan.
8-sentabr oqshomida G‘arbiy Yevropaning eng baland tog‘i — dengiz sathidan 3 ming metr balandlikdagi Monblan muzliklari ustida dor yo‘li ishdan chiqdi, bu vaqtda dor yo‘lida bo‘lgan yo‘lovchi bo‘lmalarida 110 kishi bo‘lgan.
Ma’lum bo‘lishicha, bo‘lmalarni harakatga keltiruvchilar troslar tugun bo‘lib qolgani sabab, dor yo‘li to‘xtab qolgan.
Yo‘lovchilarning aksariyati payshanba oqshomidayoq vertolyot yordamida qutqarib olingan edi. Keyinroq noqulay ob-havo sharoiti sabab qutqaruv operatsiyasi to‘xtatildi. Qolgan 33 kishi butun tunni bo‘lmada o‘tkazdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)