1-sentabr kuni Toshkentda bayram tadbirlari o‘tkaziladigan xiyobon va istirohat bog‘lari ma’lum bo‘ldi

Toshkent shahar hokimining 2016-yil 29-iyuldagi 122-f-sonli farmoyishiga ko‘ra, O‘zbekiston Respublikasi davlat mustaqilligining 25 yillik bayrami munosabati bilan 2016-yil 1-sentabr kuni soat 11:00 dan 18:00 gacha Toshkentdagi xiyobon va istirohat bog‘larida bo‘lib o‘tadigan xalq sayili hamda bayram tadbirlari rejasi tasdiqlandi. Bu haqda Toshkent shahar hokimligi axborot xizmati xabar bermoqda.

Unga ko‘ra, Alisher Navoiy nomidagi O‘zbekiston Milliy bog‘ida, Abdulla Qodiriy, Bobur, Mirzo Ulug‘bek, Furqat, G‘afur G‘ulom nomidagi madaniyat va istirohat bog‘larida, Toshkent hayvonot bog‘i, O‘zbekiston Davlat sirki, O‘zbekiston Respublikasi Mudofaa vazirligi Ma’naviyat ma’rifat markazi, “Baxt diyor” guzari oldi maydonlarida, “Lokomotiv”, “Quyoshcha nuri” madaniyat va istirohat bog‘larida alohida dasturlar asosida bayram tantanalari o‘tkaziladi.

1-sentabr kungi bayram tantanalari soat 20:00 dagi bayram salyutlariga ulanib ketadi.