Senat militsiya to‘g‘risidagi qonunni tasdiqladi

O‘zbekiston Oliy Majlisi Senati 24-avgust kuni ochilgan oltinchi plenar majlisida “Ichki ishlar organlari to‘g‘risida”gi qonunni tasdiqladi. Qonun Prezident tomonidan imzolanib, OAVda chop etilganidan so‘ng olti oy o‘tib amalga kiradi, deb xabar beradi “Gazeta.uz”.

Qonun ichki ishlar organlari tizimi va strukturasini, ularning huquqlari, majburiyat va vakolatlarini, xodimlarga qo‘yiladigan talablarni, shuningdek, ularni huquqiy va ijtimoiy himoya qilish chora-tadbirlarini belgilab beradi.

Hujjatda ichki ishlar organlari faoliyatining vazifalari, yo‘nalishlari va prinsiplari aniqlashtiriladi.

Ichki ishlar organlari vazifalarining konkretlashtirilishi, shu jumladan, bu fuqarolarning huquqlari, erkinlari va qonuniy manfaatlarini, yuridik va jismoniy shaxslar mol-mulkini himoya qilish, jinoyatlar va boshqa qonunbuzarliklarning oldini olish, aniqlash, bartaraf qilish va fosh etish, jamoat joylarida fuqarolarning xavfsizligini ta’minlash ekanligi belgilanishi ularning jamiyat va davlat oldidagi mas’uliyatini oshiradi.

Qonunda ichki ishlar organlariga qabul qilish hamda u yerda ishlashga qo‘yiladigan talablar alohida sanab o‘tiladi.