“Uka, bu yerni G‘uncha deydilar!”. Nurafshon ko‘chasi bo‘ylab giroskuterda sayr qilayotgan ona

Internetda deyarli har kuni Nurafshon ko‘chasining yangi qurib bitkazilgan bo‘lagi bilan bog‘liq suratlar e’lon qilinmoqda. Xususan, hozircha avtomobillardan holi ko‘cha kechki sayr joyiga aylangani haqida fotohisobotlar ham berildi.

Yangi qurilgan Nurafshon ko‘chasining “Tinchlik” metro bekati (G‘uncha dahasi)ga yaqin qismida olingan va Facebook’dagi “Voditeli Tashkenta” guruhida e’lon qilingan suratlardan biri alohida e’tiborga molik.

Unda giroskuter “mingan” yosh ona bolalar bilan sayr qilayotganini ko‘rish mumkin. Qiziq tomoni, onaning o‘zi giroskuterda bo‘lgani holda, chaqaloq yotgan aravachani itarib ketmoqda, uning yonida esa rolikli konki kiygan qizcha ham bor.

Surat muallifi unga: “Uka, bu yerni G‘uncha deydilar!”, — mazmunida tagso‘z qoldirgan.

Ma’lumot uchun, giroskuter — ko‘cha elektr transport vositasi bo‘lib, ikki tomonida g‘ildiragi bor taxta ko‘rinishida ishlab chiqariladi. U elektroakkumlyatordan quvvat oluvchi elektrodvigatellar yordamida harakatga keladi, shuningdek, muvozanatni saqlash imkonini beruvchi giroskopik datchiklar bilan ta’minlangan bo‘ladi. Omma orasida girobord, xoverbord, mini sigvey, smart-sigvey kabi nomlar bilan ham ataladi.