Интернетда деярли ҳар куни Нурафшон кўчасининг янги қуриб битказилган бўлаги билан боғлиқ суратлар эълон қилинмоқда. Хусусан, ҳозирча автомобиллардан ҳоли кўча кечки сайр жойига айлангани ҳақида фотоҳисоботлар ҳам берилди.
Янги қурилган Нурафшон кўчасининг «Тинчлик» метро бекати (Ғунча даҳаси)га яқин қисмида олинган ва Facebook’даги «Водители Ташкента» гуруҳида эълон қилинган суратлардан бири алоҳида эътиборга молик.
Унда гироскутер «минган» ёш она болалар билан сайр қилаётганини кўриш мумкин. Қизиқ томони, онанинг ўзи гироскутерда бўлгани ҳолда, чақалоқ ётган аравачани итариб кетмоқда, унинг ёнида эса роликли коньки кийган қизча ҳам бор.
Сурат муаллифи унга: «Ука, бу ерни Ғунча дейдилар!», — мазмунида тагсўз қолдирган.
Маълумот учун, гироскутер — кўча электр транспорт воситаси бўлиб, икки томонида ғилдираги бор тахта кўринишида ишлаб чиқарилади. У электроаккумлятордан қувват олувчи электродвигателлар ёрдамида ҳаракатга келади, шунингдек, мувозанатни сақлаш имконини берувчи гироскопик датчиклар билан таъминланган бўлади. Омма орасида гироборд, ховерборд, мини сигвей, смарт-сигвей каби номлар билан ҳам аталади.
Изоҳ (0)