Qozog‘istonda o‘tadigan o‘smirlar o‘rtasidagi futbol bo‘yicha turnirga — Prezident Kubogiga Rossiya terma jamoasi sifatida qayd qilingan jamoa tashrif buyurdi. Ushbu jamoa ketma-ket uchinchi o‘yinda yirik hisobda mag‘lubiyatga uchramoqda. Rossiya futbol ittifoqi vakillari ushbu turnirga hech kimni yo‘llamaganini aytmoqda. Bu haqda TJournal xabar bermoqda.
“Sport-Ekspress” jurnalistlari Rossiya nomidan turnirda qanday jamoa ishtirok etayotganini aniqlashga urinib ko‘rdi. Ushbu jamoa Tojikistonga 0:6, Eronga 0:10, Ozarbayjonga 1:12 hisobida imkoniyatni boy berdi.
Nashr muxbiri Rossiya futbol ittifoqi bilan bog‘lanib, masalaga oydinlik kiritishga urindi, ammo ittifoq sport direktori Sergey Pisarev turnirga biror rasmiy jamoa yuborilmaganini aytdi.
Qozog‘iston futbol federatsiyasi saytida Rossiya yoshlar termasi deb tanishtirilgan ushbu jamoaga David Xmelidze ismli shaxs rahbarlik qilmoqda. Rossiya futbol ittifoqining rasmiy saytida bunday ismi-sharifga ega murabbiy qayd qilinmagan. Ozarbayjonga qarshi uchrashuvda jamoa tarkibida to‘p surgan futbolchilar — Kulumbegov, Lebedev, Abshilava, Ablov, Ogandjanyan, Gogrichiani, Marderosyan, Yanushkevich, Papazyan, Galustyan, Rostupnyak, Kyulyan, Trifonov, Zarandiya, Vouba, Kegeyan.
David Xmelidze mahalliy jurnalistlar bilan muloqotda jamoa Yevropadagi turnirlarda tez-tez ishtirok etishini, ammo Qozog‘istondagiday “yuqori saviyali tashkilotchilik”ni hali hech qayerda ko‘rmaganini ta’kidlab o‘tdi.
“Sport-Ekspress” xulosasiga ko‘ra, Qozog‘istondagi musobaqaga Rossiya yoshlar termasi niqobi ostida Sochi shahri jamoalaridan biri yoki Krasnodar o‘lkasi yoshlar termasi kelgan.
Internetda David Xmelidze ismli rossiyalik darvozabon haqida ma’lumot mavjud. Ma’lum bo‘lishicha, u Gruziya Olimpiya terma jamoasi tarkibida to‘p surgan, so‘ng “Rostov” jamoasi asosiy tarkibida uch marta o‘yinga tushgan, bu o‘yinlar davomida u yettita to‘p o‘tkazib yuborgan. 2003-yilda darvozabon Sochining “Jemchujina” jamoasiga ijaraga berilgan. Futbolchilik faoliyatini yakunlagach, Xmelidze shaharning “Monolit” bolalar sport maktabida murabbiy bo‘lib ishlay boshlagan.
Bundan tashqari, “Rossiya 24” telekanalining Sochi filiali ma’lumotlariga qaraganda, 2015-yilda David Xmelidze ismli kishi “Barselona” jamoasining Sochidagi yozgi futbol lagerida (FCBCamp Sochi) ispaniyalik murabbiylarga assistentlik qilgan.
Izoh (0)