Қозоғистонда ўтадиган ўсмирлар ўртасидаги футбол бўйича турнирга — Президент Кубогига Россия терма жамоаси сифатида қайд қилинган жамоа ташриф буюрди. Ушбу жамоа кетма-кет учинчи ўйинда йирик ҳисобда мағлубиятга учрамоқда. Россия футбол иттифоқи вакиллари ушбу турнирга ҳеч кимни йўлламаганини айтмоқда. Бу ҳақда TJournal хабар бермоқда.
«Спорт-Экспресс» журналистлари Россия номидан турнирда қандай жамоа иштирок этаётганини аниқлашга уриниб кўрди. Ушбу жамоа Тожикистонга 0:6, Эронга 0:10, Озарбайжонга 1:12 ҳисобида имкониятни бой берди.
Нашр мухбири Россия футбол иттифоқи билан боғланиб, масалага ойдинлик киритишга уринди, аммо иттифоқ спорт директори Сергей Писарев турнирга бирор расмий жамоа юборилмаганини айтди.
Қозоғистон футбол федерацияси сайтида Россия ёшлар термаси деб таништирилган ушбу жамоага Давид Хмелидзе исмли шахс раҳбарлик қилаётгани айтилади. Россия футбол иттифоқининг расмий сайтида бундай исми-шарифга эга мураббий қайд қилинмаган. Озарбайжонга қарши учрашувда жамоа таркибида тўп сурган футболчилар — Кулумбегов, Лебедев, Абшилава, Аблов, Оганджанян, Гогричиани, Мардеросян, Янушкевич, Папазян, Галустян, Роступняк, Кюлян, Трифонов, Зарандия, Воуба, Кегеян.
Давид Хмелидзе маҳаллий журналистлар билан мулоқотда жамоа Европадаги турнирларда тез-тез иштирок этишини, аммо Қозоғистондагидай «юқори савияли ташкилотчилик»ни ҳали ҳеч қаерда кўрмаганини таъкидлаб ўтди.
«Спорт-Экспресс» хулосасига кўра, Қозоғистондаги мусобақага Россия ёшлар термаси ниқоби остида Сочи шаҳри жамоаларидан бири ёки Краснодар ўлкаси ёшлар термаси келган.
Интернетда Давид Хмелидзе исмли россиялик дарвозабон ҳақида маълумот мавжуд. Маълум бўлишича, у Грузия Олимпия терма жамоаси таркибида тўп сурган, сўнг «Ростов» жамоаси асосий таркибида уч марта ўйинга тушган, бу ўйинлар давомида у еттита тўп ўтказиб юборган. 2003 йилда дарвозабон Сочининг «Жемчужина» жамоасига ижарага берилган. Футболчилик фаолиятини якунлагач, Хмелидзе шаҳарнинг «Монолит» болалар спорт мактабида мураббий бўлиб ишлай бошлаган.
Бундан ташқари, «Россия 24» телеканалининг Сочи филиали маълумотларига қараганда, 2015 йилда Давид Хмелидзе исмли киши «Барселона» жамоасининг Сочидаги ёзги футбол лагерида (FCBCamp Sochi) испаниялик мураббийларга ассистентлик қилган.
Изоҳ (0)