Yamalda harbiylar Sibir kuydirgisidan halok bo‘lgan bug‘ularning 25 foizdan ko‘prog‘i qoldiqlarini yo‘q qildi

Rossiya mudofaa vazirligi radiatsiya, kimyo va biologik himoya qo‘shinlari mutaxassislari Yamal-Nenets avtonom okrugidagi Sibir kuydirgisi tarqalgan hududda ushbu kasallikdan halok bo‘lgan hayvonlar qoldiqlaridan chorak qismidan ko‘pini yo‘q qilishga ulgurdi. Bu haqda Markaziy harbiy okrug qo‘shinlari qo‘mondonining yordamchisi polkovnik Yaroslav Roshchupkin ma’lum qildi, deya xabar beradi “TASS”.

“Mudofaa vazirligi Yamalda tozalash ishlari sur’atini ikki barobar oshirdi. 4-avgust, payshanba kuni Sibir kuydirgisi tarqalgan hududda 240 bug‘u qoldig‘i yo‘q qilindi. Umumiy ko‘rsatkich 600 taga yetdi, bu esa nobud bo‘lgan jonivorlar jami sonining to‘rtdan bir qismidan ko‘proq”, — deya ta’kidladi Roshchupkin.

Ma’lumot uchun, tundrada Sibir kuydirgisi tufayli 2,3 mingdan ko‘proq bug‘u halok bo‘ldi.