Bu shaharlar aholisiga shu yerda yashaganlari uchungina haq to‘lanadi

Sayyoradagi ayrim shaharlar u yoki bu sababga ko‘ra aholiga muhtoj. Bunday shaharlar hududida yashagan yoki ishlagan odamlarga mo‘maygina haq to‘lanadi.

AdMe yettita mana shunday shahar haqida hikoya qiladi — u yerda yashab, shu bahona ham sayohat qilish, ham pul ishlash mumkin.

Detroyt, Michigan, AQSh

Bo‘shab qolgan Detroyt XX asrning ikkinchi yarmida “G‘arbiy Parij”, “AQShning avtomobil poytaxti” singari dabdabali sifatlarini yo‘qotdi. Hozir u eski shuhratini tiklashga urinmoqda. Muammoni hal qilish uchun hukumat Challenge Detroit nomli dasturni ishga tushirdi. Unga ko‘ra, turli soha vakillari shaharga ko‘chib kelib ishlasa, 2,5 ming dollar qo‘shimcha maoshga ega bo‘ladi.

Alyaska shtati, AQSh

Agar qishni, oppoq tabiat manzaralarini, bir maromda, to‘lg‘anishlarsiz hayotni xush ko‘rsangiz, Alyaskadagi hayot sizga ma’qul keladi. Maxsus hukumat jamg‘armasi mavjud bo‘lib, u shimoliy mintaqaning hayotida professional ishtirok etishni istaganlarga haq to‘lab boradi. Dasturning yagona talabi — Alyaskada bir yil davomida yashash.

Saskachevan provinsiyasi, Kanada

Bu hudud 2010-yilgacha universitetni bitirib, kelajagi borasida bir qarorga kelmagan insonlarga yaxshi taklif berdi. Yoshlar shaharda yetti yil yashashi uchun ularga 20 ming dollar to‘lanadi.

Niagara sharsharasi, Nyu-York shtati, AQSh

Yana bir taklif dunyoning eng go‘zal go‘shalaridan birida yashab, buning evaziga haq olish bilan bog‘liqdir. Hukumat sharshara yaqinidagi korxonalarida ikki yil davomida ishlab berishni istagan universitet bitiruvchilariga 7 ming dollar miqdorida rag‘bat pul ajratadi.

Ponga, Asturiya, Ispaniya

Ispaniya shimoli-sharqidagi o‘rmonlar ichida joylashgan ushbu maftunkor qishloqcha mamlakatning eng qadimiy aholijoylaridan biri hisoblanadi. Yosh aholi diqqatini jalb etib, mintaqa iqtisodiyotini ko‘tarish maqsadida bu yerga yashash uchun ko‘chib keladigan har bir oilaga 3 ming yevro taklif qilinadi. Bundan tashqari, har bir tug‘ilgan bola uchun 3 ming yevro to‘lanadi.

Utrext, Niderlandiya

Niderlandiya gumanitar fanlarni ijtimoiy tajribalar vositasida chuqur o‘rganishi bilan butun dunyoga mashhur. Navbatdagi tajribalardan biri — shaharda yashovchi har bir kishiga ming dollar yordam ko‘rsatilsa, bu ularga qanday ta’sir ko‘rsatadi?

Kyortis, Nebraska, AQSh

Ushbu mitti shahar ma’muriyati yaxshi g‘oya hamda mahalliy infrastruktura va madaniyatni rivojlantirishga berilgan ko‘mak evaziga uy qurish uchun bepul yer taqdim etadi.