Rossiya futbol ittifoqi mamlakat chempionatining kumush medallar sovrindori – “Rostov” klubini “Rossiya” so‘zi bitta “S” harfi bilan yozilgan medallar bilan taqdirladi. Bu haqda “Chempionat” xabar bermoqda.
Ajratilgan 40 ta medaldan tashqari “Rostov” o‘z budjetidan yana 30 ta medalga buyurtma bergandi. Ammo ular medallarni qabul qilib olganida, yozuvlarda qo‘pol xatoga yo‘l qo‘yilgani aniqlandi.
“Rossiya futbol ittifoqida qo‘shimcha medallarga buyurtma berish tavsiya qilindi. Biz rozi bo‘ldik, ammo ular xatolik bilan qilingan. ‘Rossiya chempionati’ (‘Chempionat Rossii’) o‘rniga ‘Rosiiya chempionati’ (‘Chempionat Rosiii’) deb yozilgandi. Biz buyurtmani RFIda medallar bilan shug‘ullanadigan xodim orqali amalga oshirgandik”, – deb o‘z manbasining so‘zlaridan iqtibos keltiradi “Layf”.
Xatolik tufayli taqdirlash davomida sakkizta esdalik medallaridan foydalanishga to‘g‘ri keldi. Ushbu medallarni klub xodimlaridan biri suvenir sifatida o‘zi uchun buyurtma qildirgandi.
Izoh (0)