Rossiyalik yengil atletikachilar xalqaro musobaqalar, jumladan, Olimpiadada qatnashishiga ruxsat bermagan IAAF harakatlarida mantiq va sog‘lom yondashuv mavjud emas. Bu haqda Rossiya yengil atletika federatsiyasi (RYeAF) prezidenti Dmitriy Shlyaxtin ma’lum qildi, deya xabar beradi “TASS”.
“Ular yarim yil sportchilarimiz — barcha 228 kishini sinovdan o‘tkazdi. Biz bu doping-probalar uchun qo‘shimcha pul to‘ladik, ularning barcha talab va shartlarini bajardik, har qanday muloqot uchun mutlaqo ochiq ekanligimizni namoyish etdik. Bizning sportchilarimiz toza, IAAF esa umuman mantiqqa sig‘maydigan narsalarni vaj qilib ko‘rsatmoqda.
O‘smirlar va faxriylar ham xalqaro musobaqalarga qo‘yilmadi. Nima, faxriylar ham muntazam ravishda doping qabul qiladimi? Mantiq qayerda?” — deya taajjubini bildirgan Shlyaxtin.
Eslatib o‘tamiz, oldinroq Rossiya sport vaziri Vitaliy Mutko va ikki karra Olimpiada chempioni Yelena Isinbayeva IAAF’ni tarqatib yuborishga chaqirgandi.
Izoh (0)