AQShning Texas shtati Dallas shahrida politsiyachilarni o‘ldirgan Mika Xavyer Jonson Afg‘onistonda quruqlikdagi qo‘shinlarning zaxiradagi harbiy xizmatchisi sifatida xizmat o‘tagan, deb yozadi “TASS” AQSh Armiyasiga tayanib.
Bayonotda aytilishicha, birinchi sinf piyoda askari Afg‘onistonda 2013-yil noyabridan 2014-yil iyuligacha xizmat qilgan.
25 yoshli texaslik Afg‘onistonda 420-muhandislik brigadasi tarkibida qurilish ishlari bilan shug‘ullangan. Xizmat chog‘ida bir nechta medallar bilan taqdirlangan. AQSh quruqlikdagi qo‘shinlari zaxirasida Jonson jami olti yilga yaqin vaqt bo‘lgan.
7-iyul, payshanba kuni bir nechta noma’lum kimsalar Dallas politsiyachilariga qarata o‘q uzgani xabar qilingandi. Ulardan uch nafari qo‘lga olindi. Otishmalar oqibatida 5 nafar politsiyachi halok bo‘ldi, 7 nafari yaralandi. Yana bir fuqaro jabrlandi.
Eslatib o‘tamiz, 6-iyul kuni AQShning Minnesota shtatidagi Folkon-Xayts shahrida politsiyachi qora tanli erkakning mashinasini to‘xtatib, afroamerikalikni otib o‘ldirgan edi. Ushbu voqea qora tanlilarning noroziligiga sabab bo‘ldi.
Izoh (0)