O‘zbekiston poytaxtida avtomobil yo‘llarining keng ko‘lamli ta’mirlanishi doirasida jamoat transporti bekatlarining yangilanishi ham olib borilmoqda. Bu haqda “Gazeta.uz” xabar berdi.
Faqat bostirmadan iborat eski bekatlar birin-ketin ikki yonida shishavand panellar bo‘lgan yangilariga almashtirilmoqda. Ular polikarbonat devor va tomga ega metall karkasli bo‘lib, temirbeton plitalarga o‘rnatilmoqda. Shaharning barcha yangi va ta’mirlanayotgan ko‘chalarida shunday bekatlar joylashtirilmoqda.
Keyingi bir necha oy ichida bekatlarda 3000 ta axlat qutisi o‘rnatildi, yana 2000 ta buyurtma qilingan. Shu tariqa barcha bekatlar shunday qutilarga ega bo‘ladi.
Ma’lumot uchun, hozirda Toshkentda 2000 dan ortiq bekat bo‘lib, ulardan 1068 tasi shahar obodonlashtirish boshqarmasi va uning tumandagi bo‘limlari ixtiyorida. 200 ga yaqin shisha va metalldan iborat bekat shahar hokimligi bilan shartnoma asosida JCDecaux UZ kompaniyasi tomonidan o‘rnatilgan. 113 bekat “O‘zavtoyo‘l” kompaniyasiga tegishli. 687 bekat tadbirkorlarga ijaraga berilgan, biroq ular ham shisha devor va eshiklar bilan jihozlanib, zamonaviy ko‘rinishga keltirilmoqda.
Izoh (0)