Toshkentda 23—24-iyun kunlari Shanxay hamkorlik tashkiloti (ShHT)ga a’zo mamlakatlarning Davlat rahbarlari kengashi o‘n oltinchi yig‘ilishi bo‘lib o‘tdi. Bu haqda O‘zbekiston Tashqi ishlar vazirligi matbuot xizmati xabar bermoqda.
Yig‘ilishda Hindiston va Pokistonning ShHTga to‘laqonli a’zo davlat maqomini olishi uchun majburiyatlari to‘g‘risidagi memorandum imzolandi.
“Davlat rahbarlari tashkilotning normativ-huquqiy hujjatlarida aks etgan talab va shartlarga muvofiq keladigan manfaatdor davlatlarning qo‘shilishi uchun ShHT ochiq ekanini yana bir bor qayd etib o‘tdi. Toshkent sammitida Hindiston va Pokistonning ShHTga to‘laqonli a’zo davlat maqomini olishi uchun majburiyatlari to‘g‘risidagi memorandumning imzolangani tashkilotni kengaytirish jarayonidagi muhim bosqich hisoblanadi”, — deyiladi TIV axborotida.
“Davlat rahbarlarining qayd etishicha, Hindiston va Pokistonning ShHTga to‘laqonli a’zo davlat maqomini olishi tashkilot salohiyatini oshiradi va uning xalqaro maydondagi davrning dolzarb muammolarini hal qilish, mintaqada va umuman jahonda xavfsizlik va barqarorlikni ta’minlash bo‘yicha ko‘p tomonlama mexanizm sifatidagi rolini oshirishga xizmat qiladi”, — deya qo‘shimcha qilingan vazirlik axborotida.
Ma’lumot uchun, hozirgacha Xitoy, O‘zbekiston, Qozog‘iston, Qirg‘iziston, Tojikiston va Rossiya ShHTning to‘laqonli a’zosi hisoblanadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)