Тошкентда 23—24 июнь кунлари Шанхай ҳамкорлик ташкилоти (ШҲТ)га аъзо мамлакатларнинг Давлат раҳбарлари кенгаши ўн олтинчи йиғилиши бўлиб ўтди. Бу ҳақда Ўзбекистон Ташқи ишлар вазирлиги матбуот хизмати хабар бермоқда.
Йиғилишда Ҳиндистон ва Покистоннинг ШҲТга тўлақонли аъзо давлат мақомини олиши учун мажбуриятлари тўғрисидаги меморандум имзоланди.
«Давлат раҳбарлари ташкилотнинг норматив-ҳуқуқий ҳужжатларида акс этган талаб ва шартларга мувофиқ келадиган манфаатдор давлатларнинг қўшилиши учун ШҲТ очиқ эканини яна бир бор қайд этиб ўтди. Тошкент саммитида Ҳиндистон ва Покистоннинг ШҲТга тўлақонли аъзо давлат мақомини олиши учун мажбуриятлари тўғрисидаги меморандумнинг имзолангани ташкилотни кенгайтириш жараёнидаги муҳим босқич ҳисобланади», — дейилади ТИВ ахборотида.
«Давлат раҳбарларининг қайд этишича, Ҳиндистон ва Покистоннинг ШҲТга тўлақонли аъзо давлат мақомини олиши ташкилот салоҳиятини оширади ва унинг халқаро майдондаги даврнинг долзарб муаммоларини ҳал қилиш, минтақада ва умуман жаҳонда хавфсизлик ва барқарорликни таъминлаш бўйича кўп томонлама механизм сифатидаги ролини оширишга хизмат қилади», — дея қўшимча қилинган вазирлик ахборотида.
Маълумот учун, ҳозиргача Хитой, Ўзбекистон, Қозоғистон, Қирғизистон, Тожикистон ва Россия ШҲТнинг тўлақонли аъзоси ҳисобланади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)