Toshkentdagi “Istiqlol” san’at saroyida 8—9-iyun kunlari “Sarbon” guruhi yakkaxoni Farhod Saidov “Sehrli sozlar” deb nomlangan jonli ijrodagi konsert dasturini taqdim etdi. Dasturning ikkinchi kunida mehmon bo‘lgan jurnalist Feruz Muhammad konsert haqidagi taassurotlari bilan o‘rtoqlashdi.
Dastur biroz kech, biroq o‘ziga xoslik bilan boshlandi — O‘zbekiston xalq artisti Afzal Rafiqov konsert uchun Aziz Said tomonidan maxsus yozilgan muqaddimani o‘qib eshittirdi. So‘ng, muxlislarning davomli qarsaklari ostida, sozanda, bastakor va xonanda Farhod Saidov sahnaga chiqib keldi.
“Sahroi ohanglar” nomli musiqiy kompozitsiya bilan boshlangan dasturning birinchi bo‘limida “Kuta-kuta”, “Quralay”, “Erka nigorim”, “Kabutar” nomli taronalar kuylandi. Ushbu bo‘limda kuylangan “Meni sevsang” deb nomlangan qo‘shiqni konsertga tashrif buyurgan deyarli barcha mehmonlar xonanda bilan birgalikda jo‘r bo‘lib kuyladi.
Qiziqchi Zokir Ochildiyevning chiqishi yakunlanishi bilan duetlar qismi va konsertning ikkinchi bo‘limi boshlandi. Unda italyancha “Sole mio” qo‘shig‘i Aziza Muhamedova bilan, “Aisha” nomli qo‘shiq esa O‘zbekistonda xizmat ko‘rsatgan artist Ziyoda Qobilova bilan birga maromiga yetkazib ijro etildi.
Duetlardan so‘ng “Qaylarda ko‘rganman sani”, “360 kun yondim”, “Go‘zallar ham yig‘lar ekanlar” taronalarini xonanda muxlislar bilan birgalikda kuyladi. “Sevgilim”, “Qaro ko‘zim”, “Mavrigi”, “Lazgi” qo‘shiqlari esa konsert mehmonlari tomonidan yaxshi kutib olindi. Dasturning ikkinchi kunida ssenariy buzildi — talablarga binoan, “Qizmi bu, kiyikmi bu” taronasi ijro etildi.
Farhod Saidov 2014-yilgi konsertida juda muvaffaqiyatli chiqqan sahna ko‘rinishini yana takrorladi — u afg‘on rubobi, elektrogitara, fortepiano, skripka, elektrotable, prima-rubob kabi cholg‘u asboblarini shu darajada yuqori mahorat bilan chaldiki, buni so‘z bilan ta’riflab bo‘lmaydi.
Konsertga puxta tayyorgarlik ko‘rilgani, har bir qo‘shiqqa uzoq vaqt yondashilganini alohida qayd etish joiz, xonandaning sahnada o‘zini tutishi, madaniyati, mahorati — barchasi taxsinga loyiq. “Muxlislar olib kelgan gul oyoqosti bo‘lishi mumkin emas, hammasini uyga olib ketaman”, — deya gullarni qabul qilgan Farhod Saidov, gullarni sahnaga qo‘ymay, shogirdlari yordamida sahna ortiga olib chiqib qo‘ydi.
Konsert “Vatan” deb nomlangan qo‘shiq bilan yakuniga yetdi. Shunday qilib, xonanda Farhod Saidov 2016-yilning birinchi yarim yilligida “Istiqlol” san’at saroyida qo‘yilishi rejalashtirilgan konsert dasturlarini yakunlab berdi.
Feruz Muhammad,“Daryo” uchun maxsus
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)