Тошкентдаги «Истиқлол» санъат саройида 8—9 июнь кунлари «Сарбон» гуруҳи яккахони Фарҳод Саидов «Сеҳрли созлар» деб номланган жонли ижродаги концерт дастурини тақдим этди. Дастурнинг иккинчи кунида меҳмон бўлган журналист Феруз Муҳаммад концерт ҳақидаги таассуротлари билан ўртоқлашди.
Дастур бироз кеч, бироқ ўзига хослик билан бошланди — Ўзбекистон халқ артисти Афзал Рафиқов концерт учун Азиз Саид томонидан махсус ёзилган муқаддимани ўқиб эшиттирди. Сўнг, мухлисларнинг давомли қарсаклари остида, созанда, бастакор ва хонанда Фарҳод Саидов саҳнага чиқиб келди.
«Саҳрои оҳанглар» номли мусиқий композиция билан бошланган дастурнинг биринчи бўлимида «Кута-кута», «Қуралай», «Эрка нигорим», «Кабутар» номли тароналар куйланди. Ушбу бўлимда куйланган «Мени севсанг» деб номланган қўшиқни концертга ташриф буюрган деярли барча меҳмонлар хонанда билан биргаликда жўр бўлиб куйлади.
Қизиқчи Зокир Очилдиевнинг чиқиши якунланиши билан дуэтлар қисми ва концертнинг иккинчи бўлими бошланди. Унда италянча «Соле мио» қўшиғи Азиза Муҳамедова билан, «Аиша» номли қўшиқ эса Ўзбекистонда хизмат кўрсатган артист Зиёда Қобилова билан бирга маромига етказиб ижро этилди.
Дуэтлардан сўнг «Қайларда кўрганман сани», «360 кун ёндим», «Гўзаллар ҳам йиғлар эканлар» тароналарини хонанда мухлислар билан биргаликда куйлади. «Севгилим», «Қаро кўзим», «Мавриги», «Лазги» қўшиқлари эса концерт меҳмонлари томонидан яхши кутиб олинди. Дастурнинг иккинчи кунида сценарий бузилди — талабларга биноан, «Қизми бу, кийикми бу» таронаси ижро этилди.
Фарҳод Саидов 2014 йилги концертида жуда муваффақиятли чиққан саҳна кўринишини яна такрорлади — у афғон рубоби, электрогитара, фортепиано, скрипка, электротабле, прима-рубоб каби чолғу асбобларини шу даражада юқори маҳорат билан чалдики, буни сўз билан таърифлаб бўлмайди.
Концертга пухта тайёргарлик кўрилгани, ҳар бир қўшиққа узоқ вақт ёндашилганини алоҳида қайд этиш жоиз, хонанданинг саҳнада ўзини тутиши, маданияти, маҳорати — барчаси тахсинга лойиқ. «Мухлислар олиб келган гул оёқости бўлиши мумкин эмас, ҳаммасини уйга олиб кетаман», — дея гулларни қабул қилган Фарҳод Саидов, гулларни саҳнага қўймай, шогирдлари ёрдамида саҳна ортига олиб чиқиб қўйди.
Концерт «Ватан» деб номланган қўшиқ билан якунига етди. Шундай қилиб, хонанда Фарҳод Саидов 2016 йилнинг биринчи ярим йиллигида «Истиқлол» санъат саройида қўйилиши режалаштирилган концерт дастурларини якунлаб берди.
Феруз Муҳаммад,«Дарё» учун махсус
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)