IShID yetakchisi Abu Bakr al-Bag‘dodiy va guruhning boshqa rahbarlari o‘zlarining Iroq hamda Suriya chegarasidagi qo‘mondonlik punktiga berilgan aviazarba natijasida yaralandi. Bu haqda “As-Sumariya” telekanaliga tayanib, Reuters ma’lum qildi, deya xabar beradi “RBK”.
AQSh tomonidan qo‘llab-quvvatlanadigan koalitsiya kuchlari qo‘mondonligi terrorchilar yetakchisi yaralanganini tasdiqlay olmadi.
Al-Bag‘dodiyning jarohat olgani haqidagi xabarlar deyarli har yili paydo bo‘ladi. Jumladan, 2014-yil noyabrida AQSh HHK IShID qo‘mondonlari yig‘iniga zarba bergani bildirildi va bir necha kun ularning rahbari taqdiri noma’lum bo‘lib turdi. 2015-yil mayida al-Bag‘dodiy koalitsiya aviatsiyasi hujumidan so‘ng jarohat olgani, hatto falaj bo‘lib qolgani haqida xabar tarqaldi. Oktabr oyida esa Reuters’ning Iroq armiyasidagi manbasi IShID yetakchisi mamlakat shimoli-g‘arbidagi konvoyga berilgan aviazarbadan so‘ng yaralangani va kasalxonaga joylashtirilgani to‘g‘risida ma’lum qildi, biroq bu ham o‘z tasdig‘ini topmadi.
Izoh (0)