Samarqand davlat universiteti (SamDU) nomidan Alisher Navoiy ismi olib tashlandi, deya xabar bermoqda “Gazeta.uz” O‘zbekiston hukumatining 24-maydagi qarori (pdf)ga tayanib. Endi u shunchaki “Samarqand davlat universiteti” deb nomlanadi.
Bunday qaror Alisher Navoiy nomidagi Toshkent davlat o‘zbek tili va adabiyoti universiteti ochilishi bilan bog‘liq. Yangi OTM Islom Karimovning 13-maydagi farmoni bilan tashkil qilindi.
SamDU tarixi 1927-yil — Samarqandda O‘zbek pedagogika universiteti ochilgan vaqtga borib taqaladi. 1930-yilda u O‘zbek davlat pedagogika akademiyasi deya qayta nomlandi. 1933-yilda akademiya va O‘zbek davlat tibbiyot instituti bazasida O‘zbek davlat universiteti tashkil qilindi.
1941—1944-yillarda O‘zbek davlat universiteti Toshkent davlat universiteti bilan vaqtinchalik birlashtirildi. 1944-yilda universitet yana Samarqandda faoliyatini qayta tikladi. 1960-yilda O‘zbek davlat universiteti Alisher Navoiy nomidagi Samarqand davlat universitetiga aylantirildi.
Izoh (0)