Самарқанд давлат университети (СамДУ) номидан Алишер Навоий исми олиб ташланди, дея хабар бермоқда «Газета.uz» Ўзбекистон ҳукуматининг 24 майдаги қарори (pdf)га таяниб. Энди у шунчаки «Самарқанд давлат университети» деб номланади.
Бундай қарор Алишер Навоий номидаги Тошкент давлат ўзбек тили ва адабиёти университети очилиши билан боғлиқ. Янги ОТМ Ислом Каримовнинг 13 майдаги фармони билан ташкил қилинди.
СамДУ тарихи 1927 йил — Самарқандда Ўзбек педагогика университети очилган вақтга бориб тақалади. 1930 йилда у Ўзбек давлат педагогика академияси дея қайта номланди. 1933 йилда академия ва Ўзбек давлат тиббиёт институти базасида Ўзбек давлат университети ташкил қилинди.
1941—1944 йилларда Ўзбек давлат университети Тошкент давлат университети билан вақтинчалик бирлаштирилди. 1944 йилда университет яна Самарқандда фаолиятини қайта тиклади. 1960 йилда Ўзбек давлат университети Алишер Навоий номидаги Самарқанд давлат университетига айлантирилди.
Изоҳ (0)