Qozog‘istonda yengil ateltika bo‘yicha o‘tkazilgan mamlakat Ochiq Kubogida o‘zbekistonlik Nigina Sharipova Rio–2016 Olimpiada o‘yinlarining yo‘llanmasi uchun belgilangan me’yorni bajardi, deb xabar bermoqda O‘zbekiston Milliy olimpiya qo‘mitasi matbuot xizmati.
100 metr masofaga yugurish sektorida O‘zbekiston sharafini himoya qilgan Nigina Sharipova saralash bosqichida 11,35 soniya qayd etib, musobaqaning final bosqichiga chiqdi. Final bosqichda u o‘z natijasini yanada yaxshilashga muvaffaq bo‘ldi. Nigina belgilangan masofani 11,31 soniyada bosib o‘tdi va Olimpiada o‘yinlarining yo‘llanmasi uchun belgilangan 11,32 soniyalik me’yorni bajardi.
Buxoro yengil atletika maktabi tarbiyalanuvchisi Nigina Sharipovaning yo‘llanmasi o‘zbekistonlik yengil atletikachilar tomonidan Rio–2016 Olimpiada o‘yinlariga qo‘lga kiritilgan o‘ninchi yo‘llanma bo‘ldi.
Bunga qadar o‘zbekistonlik yengil atletikachilardan Sitora Hamidova (marafon – 42 195 va 10 000 metr, ikkita yo‘llanma), Svetlana Radzivil (balandlikka sakrash), Suxrob Xo‘jayev (bosqon uloqtirish), Marina Xmelevskaya (marafon – 42 195 metr), Bobur Shokirjonov (nayza uloqtirish), Yekaterina Voronina (yettikurash), Andrey Petrov (marafon) va Nadiya Dusanova (balandlikka sakrash) Olimpiada o‘yinlarining yo‘llanmalari uchun belgilangan me’yorlarni bajargan.
Shunday qilib, o‘zbekistonlik sportchilar tomonidan Olimpiada o‘yinlariga 11 ta sport federatsiyasining 14 ta sport turidan jami 52 ta yo‘llanma qo‘lga kiritildi. 52 ta Olimpiada yo‘llanmalari bo‘yicha 55 nafar o‘zbekistonlik sportchi Rio—2016 Olimpiadasida ishtirok etadi. Sitora Hamidova (yengil atletika) va Ra’noxon Amanova (suzish) ikkitadan yo‘llanmaga ega. Baydarka va kanoeda eshkak eshish hamda badiiy gimnastika sport turlarida o‘zbekistonlik sportchilar jamoaviy bahslarda qatnashadi.
Izoh (0)