O‘zbekiston Mehnat vazirligi 19-may kuni birinchi marta onlayn matbuot anjumani o‘tkazdi, unda bir vaqtning o‘zida O‘zbekistonning turli hududlaridagi OAV vakillari qatnashdi, deb yozadi “Gazeta.uz”.
OAVlarning bunday rejimdagi ishi O‘zbekiston davlat hukumati organlari tomonidan o‘tkazilgan shunday miqyosdagi birinchi tadbir bo‘ldi. Shuningdek, bu fevral oyida Mehnat va aholini ijtimoiy muhofaza qilish vazirligi o‘rnida tashkil qilingan Mehnat vazirligi uchun ilk matbuot anjumani bo‘ldi.
Tadbirda mamlakatning turli burchaklaridan 330 dan ortiq jurnalist ishtirok etdi. Ularning savollariga vazir o‘rinbosari Bahodir Nizomov boshchiligidagi vazirlik mutaxassislari javob berdi.
Vazirlik qayta tashkil qilinganidan buyon amalga oshirilgan yangi g‘oyalar haqida aytib o‘tildi. Jumladan, aprel oyida Samarqandda vakansiyalar yarmarkasi o‘tkazildi, u yerda ishchi muhitga o‘xshatib yasalgan maxsus pavilyonlarda ish qidiruvchilar ish beruvchilarga o‘z ish mahoratlarini ko‘rsatib berishi mumkin bo‘ldi. Bunday yarmarka 22—23-may kunlari Toshkentdagi Yoshlar ijod saroyida ham o‘tkaziladi.
Bundan tashqari, Toshkentda KOICA (Hamkorlik bo‘yicha Koreya xalqaro agentligi) bilan hamkorlikda Mehnat vazirligi tizimida professional ta’lim markazi ochildi. Shunday markazlarni Samarqand, Shahrisabz, Urganch va Qo‘qonda ham ochish ko‘zda tutilgan.
Izoh (0)