Radarlardan yo‘qolgan EgyptAir samolyoti O‘rtayer dengiziga quladi. Bu haqda “Mayadin” telekanali EgyptAir aviakompaniyasidagi manbasiga tayanib ma’lum qildi, deb xabar beradi “RIA Novosti”.
Havo kemasining halokatga uchraganligi hozircha rasman tasdiqlanmadi.
“El-Vafd” portalining ma’lum qilishicha, Parijdan Qohiraga uchayotgan samolyot Gretsiya havo hududiga kirgandan 20 daqiqa o‘tib, radarlardan g‘oyib bo‘lgan.
Oxirgi ma’lumotlarga qaraganda, MS804 reysi bortida 56 nafar yo‘lovchi (ulardan uch nafari bola) va o‘n nafar ekipaj a’zosi bo‘lgan. Ularning taqdiri hozircha noma’lum.
Havo kemasining g‘oyib bo‘lganligi haqida signal olinishi bilan EgyptAir vaziyatni kuzatib borish uchun favqulodda tezkor shtabni tashkil etdi. Uning tarkibiga barcha aviatsiya xizmatlarining vakillari kiritildi. Misr va Gretsiya harbiy uchuvchilari samolyotni qidirish bilan shug‘ullanmoqda.
Aviakompaniya Twitter’dagi sahifasida yo‘qolib qolgan A-320 2003-yilda ishlab chiqarilganligini ma’lum qildi. Uni tajribali ekipaj boshqarayotgan edi, ekipaj komandiri 6 275 soat, uning yordamchisi 2 766 soat parvozni amalga oshirgan.
Eslatib o‘tamiz, avvalroq samolyotning 11 ming metr balandlikda g‘oyib bo‘lganligi haqida xabar berilgan edi.
Izoh (0)