ОАВ: Париждан Қоҳирага учаётган EgyptAir самолёти денгизга қулади

Радарлардан йўқолган EgyptAir самолёти Ўртаер денгизига қулади. Бу ҳақда «Маядин» телеканали EgyptAir авиакомпаниясидаги манбасига таяниб маълум қилди, деб хабар беради «РИА Новости».

Ҳаво кемасининг ҳалокатга учраганлиги ҳозирча расман тасдиқланмади.

«Эл-Вафд» порталининг маълум қилишича, Париждан Қоҳирага учаётган самолёт Греция ҳаво ҳудудига киргандан 20 дақиқа ўтиб, радарлардан ғойиб бўлган.

Охирги маълумотларга қараганда, MS804 рейси бортида 56 нафар йўловчи (улардан уч нафари бола) ва ўн нафар экипаж аъзоси бўлган. Уларнинг тақдири ҳозирча номаълум.

Ҳаво кемасининг ғойиб бўлганлиги ҳақида сигнал олиниши билан EgyptAir вазиятни кузатиб бориш учун фавқулодда тезкор штабни ташкил этди. Унинг таркибига барча авиация хизматларининг вакиллари киритилди. Миср ва Греция ҳарбий учувчилари самолётни қидириш билан шуғулланмоқда.

Авиакомпания Twitter’даги саҳифасида йўқолиб қолган А-320 2003 йилда ишлаб чиқарилганлигини маълум қилди. Уни тажрибали экипаж бошқараётган эди, экипаж командири 6 275 соат, унинг ёрдамчиси 2 766 соат парвозни амалга оширган.

Эслатиб ўтамиз, аввалроқ самолётнинг 11 минг метр баландликда ғойиб бўлганлиги ҳақида хабар берилган эди.