Toshkentdagi “Istiqlol” san’at saroyida xonanda Shahzodaning yetti kunlik konsert dasturi bo‘lib o‘tdi. Konsertda mehmon bo‘lgan jurnalist Feruz Muhammad o‘z fikrlari bilan o‘rtoqlashdi.
Shahzodaning 2016-yilgi konsert dasturi belgilangan vaqtidan biroz kech boshlandi. O‘z vaqtida kelgan muxlislar dastur boshlanishiga qadar to‘rt marta qarsak chalib ulgurishdi. Kech boshlandiyu, ammo boshlanishidayoq o‘ziga xos chiqish qilindi. “Qo‘llar tepaga” deb nomlangan qo‘shiq avvaliga milliy libosdagi ayollar tomonidan Xorazm shevasida, so‘ng opera yo‘nalishida kuylandi. Keyin sahnada bir qator bo‘lib tizilgan askarlar ham mazkur qo‘shiqni kuyladi. Shu chiqishning o‘zi konsert taqdirini hal qildi — qo‘shiq so‘zlariga hamohang tarzda qo‘llarini tepaga ko‘targan muxlislarning olqishlari ostida Shahzoda sahnaga chiqib keldi: qo‘shiqning davomini Shahzodaning o‘zi kuyladi.
Konsertda jarang sochgan taronalarning aksariyati Shahzodaning avvalgi mashhur qo‘shiqlari bo‘lgani sababli muxlislar ham xonandaga jo‘r bo‘ldi. Qiziq tomoni, konsertni “Shahzoda va duetdoshlar” deya nomlasa ham bo‘lar ekan — konsert mezboni Shohruxxon, “Shahzod” guruhi yakkaxoni Rashid Xoliqov, “Bojalar” guruhi, “Benom” guruhi, “Ummon” guruhi hamda Shohrux reper bilan birgalikda qo‘shiqlar kuyladi. Ayniqsa Shohrux reperning chiqishi barchaga birdek manzur bo‘ldi. Shahzoda tomonidan muxlislarga qarata: “Shohruxni sog‘indingizmi?”, degan savolga zal: “Ha!”, deb hayqirdi, davomli qarsaklar yangradi.
Shahzoda “Xasta” deb nomlangan qo‘shiqdan so‘ng sahnadan tushib, muxlislar bilan birga hech qanday musiqasiz “Tammanozi”, “Assalomu alaykum” qo‘shiqlarini jonli kuyladi. E’tiborli tomoni, konsertining aksariyat qismi fonogrammada o‘tadigan ko‘pchilik xonandalar sahnani sozandalar bilan to‘ldirib qo‘ysa, Shahzodaning konsertida birorta sozanda yo‘q edi. Bizningcha, Shahzoda jonli kuylay oladi, buni konsert vaqtida sozandalar yordamisiz, hatto ssenariyda ham nazarda tutilmagan improvizatsiyasi bilan isbotlay oldi.
Dasturda boshlovchi, qiziqchi yoki kulgu jamoalari bo‘lgani yo‘q — hammasini Shahzodaning o‘zi a’lo darajada ado etdi. Jami bo‘lib to‘rt qismdan iborat konsertda qismlar orasida xonanda tomonidan monologlar o‘qib turildi, bu vaqtda esa sahnadagi monitorda aytilayotgan fikrlarga mos suratlar ketma-ketligi namoyish etildi.
“O‘zbegim” qo‘shig‘i dasturning final taronasi bo‘ldi. Konsert dasturi ozgina-yu sozgina shiori ostida o‘tdi — unda ortiqcha, zerikadigan vaqt bo‘lmadi. Sahna bezaklari, dekoratsiya, raqs va raqqosalar, Shahzodaning malikalarga xos liboslari haqida uzoq to‘xtalishga hojat yo‘q — sanab o‘tilgan barcha jihatlar xonandaning shu vaqtgacha tashkil etilgan konsertlarida xuddi shu safargidek a’lo bo‘lgan.
Izoh (0)