Samarqand viloyatida fuqarolar yig‘inlari raislari va ularning maslahatchilari saylovi o‘tkazilmoqda. Bu haqda O‘zA xabar berdi.
Viloyatdagi 1245 fuqarolar yig‘inida ushbu jarayonga puxta hozirlik ko‘rildi. Saylovni tashkil etish va o‘tkazishga ko‘maklashuvchi viloyat, tuman va shahar komissiyalari, ishchi guruhlar tomonidan aholi o‘rtasida tushuntirish-targ‘ibot ishlari olib borildi. Mahallada yashovchi faol va tashabbuskor kishilar orasidan fuqarolar yig‘ini raisi va uning maslahatchilari lavozimiga nomzodlar ko‘rsatildi. Har bir ko‘cha, qishloqdan vakillar yig‘ilishida ishtirok etuvchilar ro‘yxati shakllantirildi.
Jomboy tumanidagi “Sarichashma” mahalla fuqarolar yig‘ini raisi va uning maslahatchilarini saylashga bag‘ishlangan vakillar yig‘ilishida 41 saylovchi ishtirok etdi. Fuqarolar yig‘ini raisligiga ko‘rsatilgan ikki nomzodga amaldagi tartib asosida so‘z berildi.
Yopiq ovoz berish yo‘li bilan o‘tkazilgan saylov natijalariga ko‘ra, Ulug‘bek Nodirov mahalla fuqarolar yig‘ini raisi etib saylandi. Rais maslahatchilari lavozimlariga ko‘rsatilgan 16 nomzod orasidan 8 nafari ochiq ovoz berish shaklida maslahatchilikka saylandi.
Viloyatdagi fuqarolar yig‘inlarida saylov davom etmoqda.
Izoh (0)