Chekka qishloqlarda 194 ta maishiy xizmatlar ko‘rsatish majmuasi tashkil etiladi

2016-yilda O‘zbekistonning chekka qishloqlarida 194 ta namunaviy maishiy xizmatlar ko‘rsatish majmualari tashkil etiladi, deya xabar bermoqda “Gazeta.uz” Vazirlar Mahkamasining 4-maydagi qarori (pdf)ga tayanib.

“Go‘zallik salonlari”, sartaroshxonalar, hammomlar, modalar atelyesi, elektr-maishiy texnika va poyabzal ta’mirlash xizmatlari ko‘rsatuvchi ustaxonalarni o‘z ichiga oluvchi maishiy xizmatlar ko‘rsatish majmualarining namunaviy loyihalari Davlat arxitektura va qurilish qo‘mitasi tomonidan ishlab chiqiladi.

Maishiy xizmat ko‘rsatish majmualari qurilishiga O‘zbekiston Respublikasi Markaziy bankining  qayta moliyalashtirish stavkasidan yuqori bo‘lmagan foiz stavkasi bo‘yicha kreditlar beriladi. 194 ta majmua qurilishiga jami 62,111 milliard so‘m, shu jumladan, 19,776 milliard so‘m bank kreditlari sarflanishi rejalashtirilmoqda.

Yangi majmualarni ochishdan ko‘zlangan maqsad aholiga servis xizmati ko‘rsatishni yaxshilash, ayollarning uy mehnatini yengillashtirish, qo‘shimcha ish o‘rinlari tashkil etish va aholi daromadlarini ko‘paytirishdir.