AQShda yarim asr muqaddam qochib ketgan jinoyatchi qo‘lga olindi

AQShning Konnektikut shtatida 71 yoshli Robert Stakovits hibsga olindi. Bu haqda TJournal xabar bermoqda.

Aytilishicha, Stakovits 48 yil muqaddam qamoqdan qochib ketgan.

1966-yilda talonchilik hujumi uchun hibsga olingan Stakovitsga hukm 1968-yilda o‘qildi. U keyingi 17 yil umrini Jorjiya shtatidagi mehnat lagerida o‘tkazishi lozim edi, ammo to‘rt oy o‘tmay qochib ketdi.

Qochoq o‘ziga yangi ism-sharif — Bob Gordon — olib, Konnektikut shtatidagi Xartford shaharchasi (aholisi — 3,5 ming kishi) chetida yashay boshladi. U qayiqlarni ta’mirlash bilan kun kechirardi.

Stakovits ijtimoiy ta’minot dasturiga talabnoma kiritganidan so‘ng shubha ostiga tushib qoldi. Besh oylik kuzatuvlardan so‘ng u 9-may kuni hibsga olindi. Endilikda keksa jinoyatchi Jorjiyaga ekstraditsiya qilinishini kutmoqda.